ԵՐԵՎԱՆ, 21 դեկտեմբերի – Sputnik. Հայաստանը կարող է դիմել ՀԱՊԿ–ին` տարածաշրջանում խաղաղություն հաստատելու համար, Sputnik Արմենիա պորտալի եթերում ասաց իրանագետ Վարդան Ոսկանյանը` մեկնաբանելով Մոսկվայում դեկտեմբերի 21-ին կայացած Կազմակերպության խորհրդի նիստը։
«Չի բացառվում, որ Հայաստանի ներգրավվածությունը ՀԱՊԿ–ին Ադրբեջանի վրա ազդելու տարրերից մեկն է, ընդ որում` կարևորագույն տարրերից։ Հայաստանը դեռևս հայտ չի ներկայացրել ՀԱՊԿ` նրա ռեսուրսներն օգտագործելու համար, թեև դա կա մեր զինանոցում և կարող է օգտագործվել տարածաշրջանում խաղաղության ու կայունության հաստատման համար», – ասաց Ոսկանյանը։
Նրա խոսքերով` խոսքը ինչպես արագ արձագանքման հավաքական ուժերի, այնպես էլ ռազմատնտեսական օգնության մասին է, որը ՀԱՊԿ–ն կարող է տրամադրել իր յուրաքանչյուր անդամի, այդ թվում` Հայաստանին, և որից զրկված է լինելու Ադրբեջանը։
Բեռնի ոչ արդյունավետ բանակցությունները և սահմանին կրակոցները պետք է, Ոսկանյանի խոսքերով, լրացուցիչ խթան դառնան Ռուսաստանի համար, որպեսզի սահմանափակվի Ադրբեջանի հետ ռազմատեխնիկական համագործակցությունը, այդ թվում` որպես ԵԱՀԿ ՄԽ համանախագահ։
Հայաստանի ու Ադրբեջանի նախագահներ Սերժ Սարգսյանի և Իլհամ Ալիևի հանդիպումը կայացել է Շվեյցարիայի Բեռն քաղաքում դեկտեմբերի 19-ին;
Ոսկանյանը նաև նշեց, որ անկախ նրանից, որ Ադրբեջանն ահաբեկչության անմիջական հովանավոր է, ՀԱՊԿ–ն նրա գործողությունները այդ համատեքստում չի դիտարկում։
