ԵՐԵՎԱՆ, 21 դեկտեմբերի – Sputnik. Չնայած նրան, որ Ադրբեջանի նախագահ Իլհամ Ալիևը չի ցանկանում լայնամասշտաբ պատերազմ սկսել, նրա կողմից սահմանին վիճակի լարումը կարող է դուրս բերել իրավիճակը վերահսկողությունից, Sputnik Արմենիա ռադիոկայանի հետ զրույցում ասել է իրանագետ Վարդան Ոսկանյանը:
«Բեռնի ամենակարևոր ձեռքբերումն այն էր, որ 2016 թվականի ընթացքում պետք է շարունակվեն աշխատանքները սահմանային իրավիճակները կարգավորող մեխանիզմների ուղղությամբ: Ինչ վերաբերում է Ադրբեջանի կողմից լարվածության սրացմանը, ապա պարզ է, որ նա փորձում է շարունակել իրականացնել այն նույն քաղաքականությունը, ինչը անում էր դիպուկահարների միջոցով», — ասել է Ոսկանյանը:
Բայց իրավիճակը տաք պահելու դեպքում, նրա խոսքերով, մի հանգամանք էլ կա, որ Ադրբեջանը հաշվի չի առնում:
«Իլհամ Ալիևը չի ցանկանում լայնամասշտաբ պատերազմի գնալ, բայց իրավիճակն այնպես կարող է փոխվել, որ անկախ իր ցանկությունից` Հայաստանի կողմից կարող է իրականացվել նաև կանխարգելիչ միջոցառում, ինչը բացառել պետք չէ», — շեշտեց Ոսկանյանը:
Նա նշեց, որ վաղ է խոսել պատերազմի մասին այս պահին, հիմա դեռ սահմանային գործողությունների մակարդակով է ամեն ինչ ընթանում, բայց կարող է ցանկացած պահի իրավիճակը դուրս գալ վերահսկողությունից:
Նրա խոսքերով` պետք չէ մոռանալ, որ պատերազմն ավարտված չէ: Կորուստները ցավալի են, բայց, ըստ նրա, հայկական կողմի գործողություններն առաջին հերթին չպետք է ուղղված լինեն ավելի մեծ վնաս պատճառելուն, այլ պետք է ուղղվեն զոհերի քանակի հնարավորինս քչացնելուն:
