ԵՐԵՎԱՆ, 21 դեկտեմբերի – Sputnik, Արման Վանեսքեհյան. Հայաստանի, Ռուսաստանի, Տաջիկստանի, Բելառուսի, Ղրղըզստանի և Ղազախստանի նախագահների առջև, ովքեր հավաքվել էին Մոսկվայում ՀԱՊԿ–ի հերթական գագաթնաժողովին, կոնկրետ խնդիր էր դրված` պայքար միջազգային ահաբեկչության դեմ։
Վտանգը բավական առարկայական է, շոշափելի և ՀԱՊԿ–ի բոլոր անդամներին վերաբերող։ Սպառնալիքները, ինչպես կարծում են գագաթնաժողովի բոլոր մասնակիցները, առաջին հերթին բխում են Իսլամական պետություն ահաբեկչական խմբավորումից։
ՀԱՊԿ–ի անդամները միջազգային ահաբեկչության դեմ արդյունավետ պայքարին ուղղված մի շարք որոշումներ են ընդունել։ Քննարկվող հարցերից էին, իհարկե, Սիրիայում ռուսական ռազմատիեզերական ուժերի գործողությունները։ Քննարկվող խնդիրների թվում էր նաև Լաթաքիայի երկնքում խոցված ռուսական ռմբակոծիչի շուրջ ստեղծված իրավիճակը, ինչպես նաև դրա քաղաքական հետևանքները։
Գագաթնաժողովի օրակարգում էր նաև ՀԱՊԿ անդամ պետությունների արտաքին սահմանների պաշպանության համար համատեղ գործողությունների անհրաժեշտության հարցը։
Փաստորեն ստացվում է, որ գագաթնաժողովի մասնակիցները եկան միասնական եզրահանգման` անհրաժեշտ է ստեղծել ընդարձակ կոալիցիա միջազգային ահաբեկչության դեմ պայքարելու համար` ՄԱԿ–ի կանոնադրության դրույթների, միջազգային իրավունքի նորմերի ու սկզբունքների համաձայն, ինչի մասին և տեղեկացրեց լրագրողներին նիստում նախագահող Հայաստանի նախագահ Սերժ Սարգսյանը։ Բացի այդ, միաձայն երկարացվել է ԵԱՀԿ գործող գլխավոր քարտուղար Նիկոլայ Բորդյուժայի լիազորություններն իր պաշտոնում ևս մեկ տարով` մինչև 2017 թվականի հունվարի 1-ը։
«ՀԱՊԿ–ի անդամ պետությունների արտաքին սահմանների համատեղ պաշտպանության հարցը Հայաստանի համար այսօր առավել քան արդիական է։ Անհրաժեշտ է չմոռանալ, որ միայն մենք Թուրքիայի հետ միասնական տարածք ունենք։ Եվ հենց թուրքական տարածքներն էլ օգտագործում են Իսլամական պետության գրոհայիններն առանց որևէ արգելքի»։
Նրա խոսքերով` ամերիկյան հատուկ ծառայությունների տվյալները հաստատում են, որ ԻԼԻՊ–ի ու Ջեբհաթ ան Նուսրայի անդամների գրեթե 90%–ը Սիրիայի ու Իրաքի տարածք են ներթափանցել հենց Թուրքիայով։
«Եվ նույն հաջողությամբ էլ դուրս են գալիս այնտեղից, եթե հանկարծ հայտնվում են, ասենք, ռուսական ՌՏՈՒ–ի կամ սիրիական բանակի ռմբակոծության տակ։ Եվ այս առումով, փաստորեն, որևէ երաշխիք չկա, որ շուտով սիրիա–թուրքական սահմանին լուրջ դիմադրություն ստանալու դեպքում Իսլամական պետության գրոհայինները չեն անցնի ՀԱՊԿ անդամ պետությունների տարածք հենց մեր սահմանով», – կարծում է փորձագետ Չաքրյանը։
Այն մասին, որ ՀԱՊԿ-ի ուշադրությունը սևեռված է հենց հայ–թուրքական սահմանին, վկայում է այն փաստը, որ այսօր ռուսական ՀՌՕ–ի ղեկավարությունը Երևանում տեղակայված Էրեբունու ավիացիոն ռազմակայանին է փոխանցել ռազմական հարվածող Մի-24Պ և տրանսպորտային Մի–8ՄՏ ուղղաթիռների հերթական խմբաքանակը։ Ընդ որում, սա ռազմական տեխնիկայի առաջին խմբաքանակը չէ, որ Կրասնոդարից բերվել է Էրեբունու ավիակայան։
