Գոհար Սարգսյան, Sputnik
Արարատի մարզի Մասիս քաղաքում վառվել են բացառիկ ու շքեղ տոնածառի լույսերը: Ոսկեզօծ գեղեցկուհին բերվել է Գերմանիայից, ունի 14 մետր բարձրություն և զարդարված է 10 հազար ոսկեգույն լապտերիկներով:
Եվրոպական տոնածառը բերվել է մոսկվաբնակ գործարար Գագիկ Ադիբեկյանի նախաձեռնությամբ: Նա դիմել է եվրոպացի մասնագետներին, ովքեր ուսումնասիրել են այն հրապարակի չափերը, որտեղ պետք է տեղադրվի տոնածառը, ու հատուկ այդ վայրի համար ստեղծել անկրկնելի ու շքեղ մի տոնածառ:
«Մեր երեխաների ուրախությանը չափ չկա, անընդհատ գնում են հիանալու շքեղ տոնածառով, պտտվում են շուրջն ու զարմանում, որ Ամանորին ընդառաջ իրենց քաղաքն էլ գեղեցկացավ ու գույն ստացավ»,-պատմում է տեղի բնակիչներից Աստղիկը:
Բարերարի մտահղացմամբ` տոնածառը մթության մեջ չպետք է փայլի. շուրջը այգի կա, որը նա ապահովել է լուսավորությամբ ու ձայնային ձևավորմամբ, այսինքն՝ օրվա ընթացքում հաճելի երաժշտություն է հնչում այնտեղ: Դեկտեմբերի 20-ին այգու հատուկ լուսավորությունը միացվեց, ու սկսվեց միջոցառումների շարքը: Ամեն շաբաթ և կիրակի օրերին կազմակերպվելու են տարատեսակ միջոցառումներ ու մրցույթներ, ինչպես նաև կա տոնավաճառ, որտեղ մասիսցիները կվաճառեն գլխարկներ ու շարֆեր՝ «Սիրում եմ քեզ, Մասիս» գրառումով: Վաճառքի ամբողջ հասույթն ուղղվելու է Մասիսի զարգացման հիմնադրամին, որն էլ քաղաքում այլ ծրագրեր իրականացնելու հավելյալ միջոցներ կունենա:
«Մասիսում մարդիկ իրենց գնահատված են զգում: Այնքան հաճելի զգացողություն է, երբ գիտես, որ հարազատ քաղաքիդ համար մեկ լումա ես ներդնում քո փոքրիկ աշխատանքով»,-ասում է բնակիչներից Լիլիթը:
Մասիսի երիտասարդ մարզիկներին էլ խրախուսելու համար Բուլղարիայից հատուկ հրավիրվել է Օլիմպիական չեմպիոն, հունահռոմեական ոճի ըմբիշ Արմեն Նազարյանը: Նա սպորտի բնագավառում ունեցած հաջողությունների համար հուշանվերներ ու պատվոգրեր է հանձնել երիտասարդներին:
Միջոցառումների մեկնարկը տրվել է ուրախ և բազմամարդ համերգով: Օրվա ցանկացած ժամի՝ մինչև ուշ երեկո, այգում կարելի է հանդիպել սիրահար զույգերի, փոքրիկներին զբոսանքի հանած ծնողների ու տատիկ-պապիկների: Մասիսն աշխուժացել է:
