ԵՐԵՎԱՆ, 21 դեկտեմբերի – Sputnik. Հայաստանի նկարիչներն ու երաժիշտները Ամանորի նախաշեմին պատմել են 2016 թվականի իրենց ծրագրերի մասին և ամփոփել ընթացիկ տարին։
Հայաստանի կոմպոզիտորների միության ղեկավար Արամ Սաթյանը, բողոքելով պետության կողմից տրվող չնչին ֆինանսական աջակցությունից, հայտնել է, որ 2016 թվականի ապրիլին հայ կոմպոզիտորների ստեղծագործությունները կհնչեն Հայաստանում կայանալիք մեծ փառատոնի ժամանակ։
Հնչելու են սիմֆոնիկ, էստրադային, մանկական և երգչախմբային ստեղծագործություններ։
«Սա հաջորդ տարվա գլխավոր միջոցառումներից մեկն է։ Նախնական տվյալներով` փառատոներն անցկացվելու են ԱՄՆ–ում, Չինաստանում, Իսրայելում և Հունաստանում», – ասել է նա` նշելով, որ հայ երաժիշտներն արդեն հասցրել են հաստատել իրենց մասնակցությունը փառատոներին։
Սաթյանը նաև նշեց, որ անցնող տարում կազմակերպած միջոցառումները նույնպես հաջողված էին, սակայն, ֆինանսական աջակցությունը «կաղում» էր։
«Ֆրանսիայում չորս միջոցառում էր կազմակերպվել` նվիրված Հայոց ցեղասպանության 100-րդ տարելիցին, սակայն դրանցից միայն երկուսն էին ֆինանսական աջակցություն ստացել պետության կողմից», – ասաց նա։
Հայաստանի նկարիչների միության նախագահ Կարեն Աղամյանը նշեց, որ 2015 թվականը բավական հաջող էր միավորման համար, մասնավորապես, հայ նկարիչները հնարավորություն ստացան մի շարք ցուցահանդեսներ անցկացնել։
Հատկապես նա նշեց Հայոց ցեղասպանության 100-րդ տարելիցին նվիրված միջոցառումները, որոնց ժամանակ ընդհանուր առմամբ շուրջ 300 նկար է ցուցադրվել։
Ընդ որում Աղամյանը դժգոհեց, որ Հայաստանում պաստառային արվեստը տարեցտարի կորցնում է իր հանրաճանաչությունը` տեղը զիջելով ժամանակակից ոչ ակադեմիական արվեստի տեսակներին։
«Անցյալ տարի նույնպես անցկացվել էր երիտասարդ նկարիչների և ուսանողների աշխատանքների ցուցահանդես։ Դա հրաշալի հնարավորություն է սկսնակների համար», – ասաց Աղամյանը։
Նկարիչների միության ղեկավարը խնդիրների շարքում նշեց արվեստանոցներում աշխատելու և կտավներ ստեղծելու մշակույթի նահանջը։ Աղամյանը կարծում է, որ պետությունը պետք է մտածի այդ ուղղությամբ։
