ԵՐԵՎԱՆ, 21 դեկտեմբերի- Sputnik. Երկրի գլխավոր ինֆեկցիոնիստ Արա Ասոյանի օգտակար խորհուրդներն ամփոփիչ ասուլիսի հիմնական թեման էին։ Բայց մասնագետի ամենակարևոր խորհուրդը, թերևս, վերջում դռների մոտ ասված արտահայտությունն էր` «անընդհատ մի համբուրվեք»։
«Ամենագլխավորը չհամբուրվելն է։ Հերիք է անընդհատ համբուրվեք։ Հատկապես խոսքը «միասեռ» համբույրների մասին է։ Դա էսթետիկ չէ»,- ասաց Ասոյանը։
Այդ անգնահատելի խորհուրդն իր հիմքերն ունի. մասնագետը հաշվի էր առել հայերի «տաքարյունությունը»։ Նրա կարծիքով` համբույրներն ու գրկախառնությունները չարաշահելու դեպքում մեծանում է տարբեր հիվանդություններով վարակվելու հավանականությունը։
Մասնագետը նշեց, որ տարվա հենց այս եղանակին ողջ աշխարհում, այդ թվում` Հայաստանում, արդիական են սուր վիրուսային վարակը և գրիպի համաճարակը։ Ինչ վերաբերում է խոզի գրիպին, որն օրերս գրանցվել է Հայաստանում, Ասոյանը ավելացրեց, որ երկրում իրավիճակը ճգնաժամային չէ։ Նա խնդրեց չկենտրոնանալ դրա վրա։
Այսօրվա դրությամբ Հայաստանում արձանագրվել է խոզի գրիպի 3 դեպք։ Նա շեշտեց, որ հիվանդության ախտանշանները մեղմացել են, և այդ տեսակի գրիպը հիվանդն այդքան ծանր չի տանում, ինչպես, օրինակ, 2009թ.-ին։
«Հարևան երկրում` Իրանում, արձանագրվել են խոզի գրիպի դեպքեր, բնական է, որ մեր երկրում էլ են նման դեպքեր գրանցվել, քանի որ առաջին հերթին այդ վիրուսը փոխանցվում է օդակաթիլային ճանապարհով։ Երկրորդ, մենք սերտ շփումներ ունենք այդ երկրի հետ»,- ասաց Ասոյանը։
Ըստ ինֆեկցիոնիստի, հիվանդությունը գլուխ է բարձրանում նոյեմբերին, հետո անկում է նկատվում, մյուս պիկային շրջանը փետրվարն է։ Տվյալ պահին սուր ռեսպիրատոր վարակի հետ կապված իրավիճակը բարդ և վտանգավոր չէ։ Ըստ հիվանդների քանակի` իրավիճակը կայուն է, չի գերազանցում անցած տարվա ցուցանիշները։
Միաժամանակ Ասոյանը նշեց, որ մարզերում հիվանդանալու դեպքեր ավելի շատ են գրանցվել, քան Երևանում։ Ընդհանուր առմամբ երկրում գործում է երեք վիրուս` H1N1-ը, B տեսակի գրիպը և H3N2-ը։
Խոսելով աղիքային ինֆեկցիաների բռնկման մասին` Ասոյանն ասաց, որ դրան նպաստել է անոմալ շոգը, ինչպես նաև ամառային ճամբարների բացումը։
Նա նշեց, որ որոշ ճամբարներ վերջերս են բացվել և կազմակերպիչները դեռ չեն կարողանում գրագետ ձևով զբաղվել հասարակական սննդի հարցերով։ Ասոյանը նաև ուրիշ խորհուրդներ տվեց. «Եթե դուք կամ ձեր երեխան հիվանդ եք, ապա մի ուղարկեք նրան մանկապարտեզ և ինքներդ աշխատանքի մի գնացեք, որպեսզի չվարակեք մյուսներին»։
Հետևելով մասնագետի խորհուրդներին` 2-3 օր շարունակ ջերմություն ունենալու դեպքում պետք է անհապաղ բժշկի դիմել։
Բժիշկը նաև Ամանորի հետ կապված մի քանի խորհուրդ տվեց` խոզի մսից հետո աղցաններ չուտել, հետո գումարել քաղցրավենիքը, հյութերն ու մեծ քանակությամբ ալկոհոլը։ Այս բոլոր ուտեստները համադրելու դեպքում անգամ ամենաառողջ մարդը չի կարող առողջական խնդիրներ չունենալ։
