ԵՐԵՎԱՆ, 20 դեկտեմբերի- Sputnik. Հագուստի վրա 1-ից մինչև 200 համարներով Ձմեռ պապերը մարզվում են: Քիչ հեռվում թեյ ու սուրճ են վաճառում: Հայտնի շոկոլադե սալիկների ընկերության լոգոտիպը կրող աղջկն անվճար կոնֆետներ է բաժանում: Հաշված րոպեներ անց Երևանում մեկնարկում է կիսամարաթոնը, իսկ այդ ընթացքում Ձմեռ պապերի հագուստով տղաները գեղեցիկ տոնական շոու են ցուցադրում:
«Կիսամարաթոնի մասին իմացա Facebook սոցիալական ցանցից: Կարդացի, որ ողջ գումարը փոխանցվելու է երեխաներին և որոշեցի բարի գործ անել, մասնակցել և միաժամանակ ստուգել ուժերս: Վերջին անգամ 5 կիլոմետր վազել էի 15 տարի առաջ»,- Sputnik Արմենիայի հետ զրույցում ասաց մասնակիցներից մեկը՝ Տիգրան Սնխչյանը:
Մինչ մեծերը թխվածքաբլիթներ են գնում փոքրերի համար, իսկ երեխաները հիացած աչքերով նայում են Ձմեռ պապերի բազմությանը, հաղորդավարն ազդարարում է՝ վազքը մեկնարկեց:
Էմմա Գասպարյանը հիանալի տրամադրություն ունի. նա մի անգամ արդեն մասնակցել է նման միջոցառման և շատ լավ է հիշում, թե ինչ դրական լիցքեր է ստացել նախորդ վազքից:
«Ինձ համար այս վազքը շատ կարևոր է. պատրաստվում եմ աշնանը կայանալիք 10-կիլոմետրանոց վազքին»,- ասում է Էմման և նշում, որ հայերը պետք է ավելի հաճախ մասնակցեն նման սպորտային միջոցառումների:
Մեքենաների ազդանշաններին զուգահեռ հնչում է հետհաշվարկը՝ «10, 9, 8…»: «Առա՜ջ» կոչից հետո մասնակիցները առաջ են նետվում: Տարբեր տարիքի վազորդների վազքուղին մեկնարկում է Կարեն Դեմիրճյանի անվան մարզահամերգային համալիրից և ավարտվում նույն տեղում:
