ԵՐԵՎԱՆ, 20 դեկտեմբերի- Sputnik. Մայր Աթոռ սուրբ Էջմիածնի սոցիալական ծառայության ղեկավար տեր Մարկոս քահանա Մանգասարյանն արդեն երկու տարի է՝ իր համախոհների հետ նպատակաուղղված և անաչառ «փոքր» բարեգործական ծրագրեր է իրագործում:
Ահա և 2016թ.-ի նախաշեմին նրա նախաձեռնությամբ դեկտեմբերի 19-ին Երևանի 5 խոշոր սուպերմարկետում ակցիաներ են անցկացվել, որոնց արդյունքում հավաքված գումարը կուղղվի Հայաստանի սահմանամերձ գյուղերի բնակիչներին:
Գիտական հետազոտությունների համաձայն, բարեգործության հիմնական պատճառն այն է, որ մարդիկ իրենց էությամբ ալտրուիստ են, նրանք կարիքավորներին օգնելու ցանկություն ունեն: Շատերն իրենց ավելի լավ են զգում, երբ փող են նվիրում կամ բարեգործություն կատարում:
Տնտեսական առումով դա կոչվում է «ալտրուիզմի ջերմություն»: Սակայն այսօր շատերը ծայրահեղության մեջ են ընկնում կամ հաշվենկատ նպատակներ են հետապնդում, օրինակ՝ գովազդ, հարկերից ազատում և այլն: Բարեգործություն կատարելիս ծայրահեղությունների մեջ են ընկնում ամենուրեք և բոլորը, ինչպես ժամանակակից «մեկենասները», այնպես էլ նրանք, ովքեր օգնություն են ընդունում:
Հենց դա է մտահոգում տեր Մարկոս քահանային, որպեսզի «երես չտա» նրանց, որոնց ուղղված է օգնությունը, սովորեցնի ոչ թե ուղղակի օգնություն ընդունել, այլ աշխատել բարեգործության ուղղությամբ:
«Մենք փորձում ենք կարիքավորներին աշխատել սովորեցնել, որպեսզի ոչ մի կերպ չխրախուսենք ձեռքը պարզած մուրացկանի կերպարը»,- պատմում է բարեգործը:
Նման բարեգործության հիմնական շարժիչ ուժը ոչ թե գովազդն է, մեծահարուստներին կամ բարեգործական հիմնադրամներին դիմելը, այլ Հայաստանի հասարակ քաղաքացիներին ներագրավելը. մարդիկ գալիս են գնումների և կարող են դրամարկղի մոտ մասնակցել, այսպես կոչված, ուղիղ բարեգործության:
Հ. Գ. Այս նախագծին արձագանքել են Հայաստանի շատ բնակիչներ. մեկն անվճար բուկլետներ և պաստառներ է տպել, մյուսն ապահովում է տեղափոխությունը, ոմանք՝ մարդասիրական օգնության հատուկ որակի ստուգումը: Իսկ առջևում Մայր Աթոռ սուրբ Էջմիածնի սոցիալական ծառայության նոր նախագծերն ու ծրագրերն են:
