Անի Լիպարիտյան, Sputnik
Հեռանկարային, երիտասարդ և գեղեցկուհի Թինա Կարապետյանը Զագրեբում անցկացված գեղասահքի միջազգային մրցաշարում իր զուգընկեր Սիմոն Պրու-Սենեկալի հետ երրորդ տեղն է զբաղեցրել ՝ ըստ արժանվույն ներկայացնելով Հայաստանը:
Մարզուհին Sputnik Արմենիային տված բացառիկ հարցազրույցում պատմում է, թե ինչպես է ապրելում ու մարզվում Կանադայում և միաժամանակ հայրենի երկիրը ներկայացնում տարբեր մրցումներում և առաջնություններում:
Գեղասահորդների ձեռքբերումները
Թինայի և նրա գործընկերոջ վերջին նվաճումն ապացուցում է՝ կարևոր չէ՝ որ երկրում ես ապրում և մարզվում, կարևորը նպատակն է ու ցանկությունը:
«Ես գեղասահքով սկսել եմ զբաղվել 5 տարեկանից: Մինչև 14 տարեկան միայնակ էի ներկայանում, հետո մեկ տարի՝ սինխրոն, և երկու տարի՝ Ալեքսանդր Լալիբերտեի հետ»,- պատմեց գեղասահորդուհին:
2015թ.-ին նա փոխել է զուգընկերոջը և արդեն կես տարի է՝ ելույթ է ունենում 23-ամյա Սիմոն Սենեկալի հետ:
«Միասին ելույթ ենք ունեցել ԱՄՆ-ում: Քվեբեկում, Ժորժ-Էթյենի մրցումներում զբաղեցրել ենք երրորդ տեղը: Մեր վերջին ձեռքբերումը Զագրեբի միջազգային մրցաշարն էր և նվաճած երրորդ տեղը: Մենք Սիմոնի հետ շատ գոհ էինք Զագրեբի ելույթի արդյունքից, քանի որ առաջին տեղը զբաղեցրած զույգը միասին մարզվում է արդեն 6 տարի, իսկ մենք՝ ընդամենը վեց ամիս»,- պատմեց Թինան:
Այլազգի Սիմոնը՝ Հայաստանի դրոշի ներքո
Նրա զուգընկերը հայ չէ, բայց ամենահետաքրքիրն այն է, որ Կարապետյան-Սենեկալ զույգին մամուլը ներկայացնում է որպես «հայ գեղասահորդների»:
Թինան խոստովանում է՝ ինքն ու պարընկերը շատ հպարտ են, որ ներկայացնում են Հայաստանը, թեև իրականում Սիմոնը հայ չէ:
«Դրա համար շնորհակալ ենք մեր մարզիչներին և մեր օգնական Մելանյա Ստեփանյանին»,- ասաց մարզուհին:
Գեղասահորդները չափազանց ուշադիր են վերաբերվում մարզումներին և փորձերին: Շաբաթական հինգ անգամ, օրական 3-4 ժամ անցկացնում են սառույցի վրա: Ուժային և ճկունության վարժանքները կատարվում են առանձին գրաֆիկով, և արդյունքն ակնհայտ է:
Պատասխանելով Sputnik Արմենիա պորտալի այն հարցին, թե կցանկանա՞ր մարզվել հայրենիքում, եթե Հայաստանում նման հնարավորություններ լինեին, ինչպես Կանադայում, Թինան պատասխանեց. «Անկասկած: Ես անձնամբ շատ հպարտ եմ, որ ներկայացնում եմ Հայաստանը: Կարևոր չէ, թե որտեղ ենք մարզվում: Երկիրը ներկայացնելն ամենամեծ պատիվն է»:
Սեր Հայաստանի նկատմամբ
Կանադայում ծնված գեղասահորդուհին Հայաստանում է եղել այս տարվա օգոստոսին: Խոստովանում է, որ հիացել ու հուզվել է, քանի որ առաջին անգամ էր տեսնում հայրենիքը:
Բայց Թինան առայժմ չի որոշել, թե որտեղ են մեծանալու իր երեխաները, քանի որ նրա խոսքով՝ դեռ շատ երիտասարդ է:
«Ես սովորում եմ քոլեջում, ինձ և քույրերիս ընտանիքս է օգնում: Օրերս հագեցած են մարզումներով ու դասերով… Ուստի եթե ազատ ժամանակ եմ ունենում, ապա փորձում եմ այն անցկացնել ընտանիքիս, հատկապես քույրերիս հետ»,- խոստովանեց Թինան:
Եվ իհարկե, ինչպես ցանկացած մարզիկ, այնպես էլ Sputnik Արմենիայի զրուցակիցը երազում է մասնակցել օլիմպիադային:
Թինան հայազգի առաջին մարզիկը չէ, ով ապրելով այլ երկրում՝ հանդես է գալիս Հայաստանի դրոշի ներքո: Մի քանի տարի առաջ հայկական դրոշը ներկայացրեց Վազգեն Ազրոյան-Անաստասիա Գրեբյոնկինա զույգը: Վերջին շրջանում Հայաստանում գեղասահքին հատուկ ուշադրություն է դարձվում: Օրեր առաջ Երևանում բացվեց Իրինա Ռոդնինայի անվան գեղասահքի մարզադպրոցը:
