Ինչպե՞ս եք գնահատում հայ-ադրբեջանական սահմանին տեղի ունեցած վերջին իրադարձությունները:
— Եթե անկեղծ, ապա անձամբ ինձ համար անտրամաբանական և անհասկանալի էր, որ իրավիճակը կտրուկ սրվեց հայ-ադրբեջանական սահմանին և շփման գծում: Ի սկզբանե ես համոզված էի, որ Ադրբեջանը փորձում է զերծ մնալ ռուս-թուրքական խնդիրներից և քաղաքական շահարկումներից: Չէ՞ որ Բաքվում պետք է իսկույն կռահեին, որ Թուրքիան, որը համաշխարհային հանրությանը ներկայանում որպես Ադրբեջանի ավագ եղբայր, ինքն իրեն փակուղի է տարել: Բացառված չէ, որ վաղը ՄԱԿ-ը նրան ճանաչի որպես ահաբեկիչներին աջակող պետություն:
Ինչպե՞ս պետք է արձագանքի Հայաստանը և ինչի՞պետք է պատրաստ լինի:
— Դե, մեր խնդիրը ցանկացած դեպքում չի փոխվում: Անհրաժեշտ է միավորել բոլոր հնարավորություններն ու ռեսուրսները, պատրաստ լինել իրադարձությունների ցանկացած զարգացման: Պետք է շարունակել զարգացնել փոխհարաբերությունները և ավելի ակտիվ համագործակցել մեր թիվ մեկ դաշնակցի և ընկերոջ՝ Ռուսաստանի հետ:
Իսկ ինչպե՞ս կարող են զարգանալ իրադարձություններն արդեն արևմտյան ուղղությամբ: Հայաստանին վտանգ սպառնու՞մ է Թուրքիայի կողմից:
— Իսկ ինչ վերաբերում է հայ-թուրքական սահմանի հետ կապված իրավիճակին, ապա այդ առումով պետք է հաշվի առնել հետևյալը: Հաշվի առեք, որ թուրքական դիվանագիտությունը դեռ երբեք չի ներկայացել համաշխարհային հանրությանն այսքան անբարենպաստ լույսի ներքո, ինչպես այժմ: Թե՛ քաղաքական ասպարեզում, թե՛ Ռուսաստանի հետ հարաբերություննների զարգացման ոլորտում Թուրքիայի արձագանքը գրեթե անհնար է գուշակել: Բացառված չէ, որ նրանք գիտակցված կգնան իրավիճակի սրման նույնիսկ հայ-թուրքական սահմանին և Նախիջևանի շրջանում: Ի դեպ, ես անձամբ կարծում եմ, որ Նախիջևանն ավելի շուտ թուրքական, քան ադրբեջանական տարածք է: Եվ այդ առումով մենք պետք է բարոյապես և ֆիզիկապես պատրաստ լինենք ցանկացած սցենարի, իրադարձությունների ցանկացած զարգացման: Հատկապես այդ հատվածում:
Ստեղծված իրավիճակում Հայաստանի դիրքորոշումը պասի՞վ չէ:
— Այդ առումով պետք է ասեմ, որ Հայաստանը ռուս-թուրքական հարաբերությունների ճգնաժամի իրավիճակում իրեն չափազանց պասիվ է պահում հենց քաղաքական ասպարեզում: Բոլոր հասանելի միջազգային ատյաններից պետք է ակտիվ աջակցություն արտահայտել՝ հասցեագրված Կրեմլին: Մյուս կողմից, կարծում եմ՝ ներկա իրավիճակն այնպիսին է, որ նման պասիվ դիրքորոշումն, ամենայն հավանականությամբ, ի սկզբանե պայմանավորված է դաշնակիցների միջև… Եթե հետևենք այդ տրամաբանությանը, ապա առայժմ ամեն ինչ կարգին է:
