ԵՐԵՎԱՆ, 19 դեկտեմբերի — Sputnik. Վերջին 7 տարում Հայաստանի և Ադրբեջանի նախագահների մակարդակով մոտ 2 տասնյակ հանդիպումներ ու գագաթաժողովներ են տեղի ունեցել: Ինչպես նշել է ՀՀ արտգործնախարար Էդվարդ Նալբանդյանը, մի շարք գագաթնաժողովների ընթացքում կողմերը շատ մոտ են եղել համաձայնության, սակայն Ադրբեջանը միշտ հետքայլ է արել:
«Վերջին գագաթնաժողովին, որը կայացավ Փարիզում անցյալ հոկտեմբերին, բավական ժամանակ է անցել՝ մեկ տարուց ավելի, և շատ կարևոր էր նոր հանդիպում կազմակերպել»,- Սարգսյան-Ալիև հանդիպումից հետո հայտարարել է ՀՀ ԱԳ նախարար Էդվարդ Նալբանդյանը՝ ամփոփելով բանակցությունների արդյունքները։
«Մենք շատ շնորհակալ ենք Շվեյցարիայի կառավարությանը, որ հյուրընկալեցին այս գագաթաժողովը, շնորհակալ ենք նաև եռանախագահող երկրներին իրենց ջանքերի համար՝ ուղղված նախագահների մակարդակով նոր հանդիպումների կայացմանը, որոնք նպատակ ունեն առաջ մղել բանակցային գործընթացը: Բայց գործընթացն առաջ մղելու համար այդ տրամադրվածությունը պետք է ունենա նաև Ադրբեջանը: Իրականում ոչ միայն այդպես չէ, այլև՝ հակառակը:
Այս գագաթնաժողովի օրակարգը թելադրված էր իրավիճակի սրմամբ, Ադրբեջանի կողմից սադրանքների, հրադադարի կոպտագույն խախտումների արդյունքում: Բնական է, երբ այսպիսի սուր իրավիճակ է տիրում, մյուս բոլոր հարցերը երկրորդ պլան են մղվում: Ադրբեջանը չի կարողանում ազատվել այն պատրանքից, որ կարող է օգտագործել ուժի կիրառումն ու դրա սպառնալիքը որպես բանակցային գործիք»,- ասել է Էդվարդ Նալբանդյանը։
