ԵՐԵՎԱՆ, 19 դեկտեմբերի- Sputnik, Արման Վանեսքեհյան. Թուրքիայի հարավ-արևելքում իրավիճակի սրացումն զգում են նաև սահմանամերձ հայկական գյուղերի բնակիչները: Նրանք նշում են, որ գիշերային ժամերին սահմանի մյուս կողմից կրակոցների ձայներ են լսվում:
Համաշխարհային ԶԼՄ-ների տեղեկատվության համաձայն, Քրդստանի աշխատանքային կուսակցության զինված ջոկատների ոչնչացման գործողությունում Անկարան գործարկել է ավելի քան 10-հազարանոց զորամիավորում՝ կազմված կադրային զորամասերից և ոստիկանական ջոկատներից:
Հիմնական մարտական գործողությունները ծավալվում են Դիարբեքիր քաղաքի մոտակայքում և հարակից շրջաններում (Ջիզրե, Սիլոպի և Նուսայբինե քաղաքներ): Թուրքիայի զինված ուժերի գլխավոր շտաբի ներկայացրած պաշտոնական տվյալների համաձայն, միայն վերջին երկու օրում քրդական զինված ջոկատների հետ բախումների հետևանքով սպանվել է 25 մարդ, կորուստներ են կրել նաև Թուրքիայի ԶՈՒ-ի ներկայացուցիչները:
Փաստորեն այնպես է ստացվում, որ Ռեջեփ Թայիփ Էրդողանի վերջին ելույթներից մեկը, որի ժամանակ Թուրքիայի նախագահը բավական կոշտ է արտահայտվեց քրդերի մասին, քաղաքական տեսանկյունից ընդամենը նախնական հետախուզություն էր:
Էրդողանը, խոստանալով «թաղել ապստամբներին իրենց իսկ փորած խրամատներում», սպասել էր մի որոշ ժամանակ: Հետո Արևմուտքի արձագանքը չստանալով՝ նրա հրահանգով երկրի զինված ուժերն անցան քրդաբնակ շրջանները «մաքրելու» գործողություններին:
