2015թ.-ին Հայաստան է ներմուծվել շուրջ 30 հազար ավտոմեքենա, Sputnik Արմենիա պորտալին հայտնեց ֆինանսների նախարարության ավտոտրանսպորտային միջոցների մաքսային ձևակերպումների մասնագիտացված մաքսատան ղեկավար Բաբկեն Ղազարյանը։
Նրա խոսքով` շուրջ 5700 մեքենա ներմուծվել է ԵՏՄ երկրներից, ևս 24 հազարը` ԱՄՆ-ից, Եվրոպայից և Ճապոնիայից, Վրաստանից, ԱՄԷ-ից և այլ երկրներից։ Վրաստանն ու ԱՄԷ-ն այս տարի թուլացրել են իրենց դիրքերը։ «Հիմնականում բերում են միջին և միջինից բարձր դասի մեքենաներ։ Անցած տարիների համեմատ այս տարի 10 տարուց ավելի շահագործված մեքենաներ քիչ են ներմուծվել։ Հիմնական ներմուծվող ապրանքանիշներն են Toyota-ն, BMW-ն, Lexus-ը, Mercedes-ը»,- ասաց Ղազարյանը։
Ըստ նրա, Mercedes դասի S և G, Nissat Tiana և Fuga, Lexus շարքի LX ավտոմեքենաների համաշխարհային շուկայում գների անկման հետ կապված` 20 տոկոսով (շուրջ 400 դոլարով) նվազել են մաքսատուրքերը։ Մաքսատան աշխատողի խոսքով` անցած տարվա համեմատ, ներմուծվող մեքենաների թիվը զգալիորեն նվազել է։ «2014թ.-ին ներկրվել է 46 100 մեքենա։
«Նման բարձր ցուցանիշը պայմանավորված է նրանով, որ մեր քաղաքացիները վախեցել են, որ երբ Հայաստանն անդամակցի ԵՏՄ-ին, մաքսային վճարումները կավելանան, թեև մենք նախազգուշացրել էինք, որ նման բան չի լինի»,- ասաց Ղազարյանը։ Նա նաև նշեց, որ գրեթե տասն անգամ ավելացել է Հայաստանից արտահանված մեքենաների քանակը. 2015թ.-ին արտահանվել է 4500 մեքենա` անցած տարվա 400-500-ի դիմաց։
Ինչպես կարծում է պաշտոնյան, դա ցուցանիշ է, որ Հայաստանը «ավտոմեքենաների գերեզմանատան» չի վերածվում։ Նա նաև հայտնեց, որ անցած տարի իրենք բացահայտել են 62 չմաքսազերծված մեքենա, այժմ աշխատանքներ են տանում ևս 150-ը հայտնաբերելու ուղղությամբ։ Ղազարյանը պատմեց, որ մասնագիտացված մաքսատան նախաձեռնությամբ ԵՏՄ-ից ներկրվող մեքենաների թղթաբանությունն անցկացվում է հատուկ առանձնացված գոտում` ԱԱՀ վճարումով։
Այսպիսով, քաղաքացիները կարող են հարկային պարտավորություններ իրականացնել և զուգահեռ ստուգում անցնել մասնագիտացված կենտրոնի կողմից` Ինտերպոլի փաստաթուղթ ստանալու, ինչպես նաև ոստիկանությունում հաշվառում անցնելու համար։
