ԵՐԵՎԱՆ, 18 դեկտեմբերի-Sputnik. Գոհար Սարգսյան. Թուրքագետ Ռուբեն Մելքոնյանի գործընկերը Ստամբուլում էր, երբ Թուրքիայի բանակի կործանիչները խոցեցին ռուսական ինքնաթիռը: Նա մինչև օրս չի մոռանում այն զարհուրելի տեսարանը, թե ինչպես թուրքերն ուրախացան՝ լուրը լսելով: Վաճառականներից մեկն իմանալով, որ խանութի հաճախորդը հայ է` ասել է. «Այսօր խփեցինք ռուսական ինքնաթիռը, վաղը մտնելու ենք Հայաստան»:
Թուրքագետն անդրադարձավ նաև Ռուսաստանի նախագահ Վլադիմիր Պուտինի՝ դեկտեմբերի 17-ի մամուլի ասուլիսի ընթացքում հնչեցրած տեսակետներին:
«Պուտինի արտահայտությունները սուր էին, բայց միևնույն ժամանակ լիովին օբյեկտիվ էին արտացոլում այն իրողությունը, որը ձևավորվել է Թուրքիայի քաղաքականության մեջ: Ռուս-թուրքական լարված հարաբերություններում Ռուսաստանը շարունակում է մնալ որպես արդար պահանջատեր: Իսկ թուրքական պաշտոնական հայտարարությունները գնալով ավելի շատ են ներառում Արևելյան շողոքորթության, ինչպես նաև հարցի բուն էությունից խուսափելու, երբեմն էլ երկրորդական խնդիրներն առաջ մղելու տարրեր: Ի դեպ, նկատելի է նաև, որ Թուրքիան պատսպարվում է ՆԱՏՕ-ի հովանու ներքո` փորձելով ամեն կերպ ցուցադրել իր հավատարմությունը»,-վերլուծում է Ռուբեն Մելքոնյանը:
Թուրքագետն ուսումնասիրել է նաև թուրքական մամուլի հրապարակումներն ու կարծում է, որ դրանք Պուտինի տեսակետներն ու իրականությունը ներկայացնում են աղավաղված տեսքով: Կոշտ դիրքորոշումները «կրճատված ու հանված էին»:
«Սա ցույց է տալիս, որ թուրքական քաղաքական մեքենան արդեն գիտակցում է, որ ի զորու չէ պատասխանել Ռուսաստանին ինչպես քաղաքական հռետորաբանության, այնպես էլ քաղաքական գործողությունների առումով: Թուրքական ֆոբիան գնալով խորանում է: Միաժամանակ թուրքական իշխանությունը փորձելու է ծառայություններ մատուցել արևմտյան գործընկերներին՝ այսպիսով ձեռք բերելով դաշնակիցներ ընդդեմ Ռուսաստանի»,-ասում է թուրքագետը:
Մելքոնյանն ընդգծում է նաև, որ Արևմուտքի կողմից Թուրքիային սատարելը գուցե անհաջողության մատնվի, քանի որ ռուսական քայլերն ունեն իրավական, քաղաքական և ռազմական կարևոր ու համաշխարհային մասշտաբով ընդունելի հիմքեր:
«Թուրքական ստոր քաղաքականությունը դարերի ընթացքում փոփոխության չի ենթարկվում: «Չմոռանանք, որ Հայոց ցեղասպանությունից հետո թուրքական դատարանն արդարացրեց ոճրագործներին, նրանց հռչակեց ազգային հերոսներ ու անգամ պարգևատրեց: Տրամաբանական շարունակությամբ՝ Էրդողանն իր հասարակության ներկայացնողն է, իսկ դիվանագիտական արարողակարգային նորմերից հեռու հայտարարություններն ընկալելի են թուրքական հասարակության կողմից»:
Ռուբեն Մելքոնյանն անդրադարձավ նաև դեկտեմբերի 19-ին Հայաստանի և Ադրբեջանի նախագահների սպասվող հանդիպմանը: Նա հատկապես նշեց, որ որևէ նոր բան չի ակնկալում այդ հանդիպումից և վստահ է, որ կլինեն հերթապահ հայտարարություններ:
