ԵՐԵՎԱՆ, 18 դեկտեմբերի — Sputnik. Ավետիսյանների գործով դատավարության ընթացքում փաստաբանները միջնորդություն են ներկայացրել այն մասին, որ ռուս զինծառայողներին հեռացնեն դատարանի դահլիճից:
«Մենք Հայաստանի Հանրապետության դատարանում ենք գտնվում, ոչ թե կալանավայրում, ռուս զինծառայողները այս դատարանում գտնվելու իրավունք չունեն: Եթե նույնիսկ անվտանգության մասին եք մտածում, ապա այստեղ երկու հայ ոստիկան կա, այսինքն նրանք կարող են անվտանգություն ապահովել», — ասաց Ավետիսյանների իրավահաջորդի ներկայացուցիչ-փաստաբան Լուսինե Սահակյանը:
Գյումրիում, որտեղ տեղակայված է 102-րդ ռուսական ռազմական բազան, հունվարի 12-ին սպանվել է մի ամբողջ ընտանիք, մեկուկես տարեկան երեխան մահացել էր մեկ շաբաթ անց։ Հանցագործության կասկածանքով նույն օրը ձերբակալվել էր ռուս պայմանագրային զինծառայող Վալերի Պերմյակովը: Նա փորձել էր անցնել Թուրքիայի տարածք, և ռուս սահմանապահները նրան հայտնաբերել էին հենց սահմանին:
