Անի Լիպարիտյան, Sputnik.
Տարեցտարի ավելի քիչ են խոսում վետերանների մասին և հիշում նրանց, այն մարդկանց, որոնք իրենց կյանքը վտանգելով` պայքարել են ֆաշիստական ժանտախտի դեմ, որպեսզի ներկա սերունդը խաղաղ և անվտանգ ապրի։
Ցավոք, վետերանների մասին ընդունված է հիշել տարին մեկ-երկու անգամ, մասնավորապես` հունիսի 22–ին և մայիսի 9–ին։ Երիտասարդությունը, լրագրողները և ժամանակակից հեղինակները գովաբանում են ինչ–որ «երևակայական» հերոսների` մոռանալով իսկական հերոսների մասին։
Ուղևորվելով Ռուս–հայկական (Սլավոնական) համալսարան «Սրտի հիշողություն» ֆիլմի պրեմիերային` ես նախօրոք գիտեի, որ պետք է հանդիպեմ մարդկանց, որոնք 70 տարի առաջ անմիջական մասնակցություն են ունեցել մարտական գործողություններին։ Մոտեցա առաջին շարքին, որպեսզի նայեմ վետերանների աչքերին։ Եվ հետաքրքրասեր հայացք տեսա։
Հայրենական մեծ պատերազմի վետերան և Հայաստանի վաստակավոր ուսուցիչ Ռոզալիա Աբգարյանը, ով ներկա էր պրեմիերային, իսկույն բռնեց ձեռքս։
Նրա ափն այնքան տաք էր, հաղորդում էր այն մարդու անհավանական էներգետիկան, ով այս կյանքում շատ բան է տեսել։ Նա ժպտաց։
«Ի՞նչ պետք է անի երիտասարդ սերունդը, որպեսզի Հայաստանը բարգավաճի։ Չէ՞ որ 70 տարի է անցել ֆաշիզմի դեմ տարած հաղթանակից»,– հարցրեցի վետերանին։
Նա ժպտաց և հստակ պատասխանեց. «Սիրել իր երկիրը»։
Ռոզալիա Սերգեևնան համոզված է, որ երբ մարդը սիրում է, ապա անհրաժեշտ ամեն ինչ անում է. «Կրթություն ստացեք, սկսեք աշխատել և ամեն ինչ արեք հանուն ձեր երկրի բարօրության։ Իսկ դա հնարավոր կլինի այն ժամանակ, երբ մեր երկրում տիրի խաղաղություն և հանդարտություն։ Իսկ խաղաղությունը և հանդարտությունը մենք ինքներս պետք է նվաճենք, ստեղծենք»։
Sputnik Արմենիայի զրուցակիցը բարձրացրեց երկրորդ ձեռքը և ասաց, որ ՀՄՊ վետերաններն էստաֆետը փոխանցել են հուսալի ձեռքեր։
«Կարծում եմ, որ եթե մեր երիտասարդ սերունդն իմանա իր երկրի պատմությունը, իր երկրի անցյալը, ապա անպայման կսիրի իր երկիրը և ամեն ինչ կանի նրա զարգացման համար»,– նշեց Աբգարյանը։
93–ամյա Ռոզալիա Սերգեևնան ասաց, որ վետերանները երջանիկ են, որ տեսել են Հաղթանակը և ապրում են հիմա։ Նա հիշեց, թե ինչպես է նշել Մոսկվայում նախորդ Հաղթանակի օրը Ռուսաստանի նախագահ Վլադիմիր Պուտինի հետ։
«Մայիսի 9-ը մեր կյանքի ամենաերջանիկ և ամենալավ օրն է։ Եվ Թուխմանովի երգի տողերը` «դա տոն է ճերմակ մազերով, արցունքն` աչքերին» ամենալավն են արտահայտում այդ տրամադրությունը»,- ասաց նա։
Sputnik Արմենիայի զրուցակիցը ցանկություն հայտնեց, որ այսօր դահլիճում ներկա վետերանները բարեկեցիկ կյանքով ապրեն։
«Չէ՞ որ նրանք այն մարդիկ են, որոնք 3-4 տարի կանգնել են առաջնագծում։ Եվ ես շատ եմ ցանկանում, որպեսզի դուք երջանիկ լինեք, սիրեք և սիրված լինեք, որպեսզի ձեզ հասկանան շրջապատում, և դուք միշտ մտածեք այն մասին, որ պետք է միշտ ինչ–որ լավ բան անեք»,– ասաց նա։
«Սրտի հիշողություն» ֆիլմը ստեղծվել է «Ռուս–հայկական երիտասարդական միասնություն» ՀԿ–ի կողմից Հայաստանում Ռուսաստանի դեսպանատան, Երևանում Գիտության և մշակույթի ռուսական կենտրոնի, Ռուս–հայկական (Սլանովական) համալսարանի և Հայաստանի վետերանների միավորված միության աջակցությամբ։
Միջոցառմանը ներկա էր նաև Հայաստանում ՌԴ արտակարգ և լիազոր դեսպան Իվան Վոլինկինը, ով կարևորեց ՀՄՊ–ում Հաղթանակի 70–ամյակին նվիրված միջոցառումները։
