ԵՐԵՎԱՆ, 17 դեկտեմբերի-Sputnik. Գոհար Սարգսյան. Տեր Վիրապ քահանա Ղազարյանը Արագածոտնի մարզի Ապարան քաղաքից երկու տարի առաջ տեղափոխվեց Ուկրաինա, հանդիպեց հայ համայնքի ներկայացուցիչների հետ ու հասկացավ՝ անելիքները շատ են: Տեղի հայերի օջախներում լսեց ոչ թե հայերեն, այլ ուկրաիներեն:
«Զապորոժիե քաղաքի հայերին հորդորում եմ եկեղեցուն վերաբերվել ոչ միայն որպես Աստծո տան, այլև փոքրիկ Հայաստանի, որտեղ պետք է հաղորդակցվել ազգային ավանդույթներին ու մշակույթին: Այստեղ եմ եկել ինչպես ծիսակատարություններ, այնպես էլ հայանպաստ գործունեություն իրականացնելու համար»,-պատմում է Զապորոժիե քաղաքի Սուրբ Աստվածամայր եկեղեցու հոգևոր սպասավոր Տեր Վիրապ քահանա Ղազարյանը:
Քահանան պատմում է, որ փողոցով քայլում է ու ամենուր հայրենակիցների հանդիպում: Նրանք հիմնականում զբաղված են փոքր բիզնեսով:
«Այստեղ կա փողոց, որտեղ բոլոր սրճարաններն ու ռեստորանները հայերին են պատկանում ու հայկական անուններ ունեն` «Երևան», «Անի», «Գյումրի»: Մենք այդ փողոցն անվանել ենք «Պռոշյան»»,- ժպիտով ու անթաքույց հպարտությամբ պատմում է հոգևորականը։
Անդրադառնալով ավելի ցավոտ խնդիրների՝ քահանան պատմում է, որ Հայ առաքելական եկեղեցու հետևորդների կողքին կան նաև աղանդավոր հայեր: Երկու տարվա ընթացքում Տեր Վիրապ քահանային հաջողվել է նրանցից մի քանիսին դարձի բերել, սակայն դա միշտ չէ, որ ստացվում է:
«Օտարության մեջ ապրելը բարդ է. սա Հայաստանը չէ: Տարբեր աղանդավորական կազմակերպություններում ներգրավված հայերի հետ զրույցներ ենք ունենում և փորձում մոտեցնել Հայ առաքելական եկեղեցու գաղափարախոսությանը: Ի դեպ, այստեղ հայերը եկեղեցի են գալիս ոչ միայն մոմ վառելու. շատերն արդեն պատարագների են մասնակցում ու հաղորդություն ստանում»,-ասում է Տեր Վիրապը։
Վերջին տվյալներով՝ Ուկրաինայում ապրում է ավելի քան հարյուր հազար հայ, իսկ Զապորոժիեում այդ թիվը հասնում է 17 հազարի:
