ԵՐԵՎԱՆ, 16 դեկտեմբերի- Sputnik. Եվրամիության բոլոր անդամ երկրները համաձայն են, որ Ռուսաստանի դեմ սահմանած պատժամիջոցները կես տարով երկարացվեն, այդ հարցը չպետք է քննարկվի Եվրամիության գագաթնաժողովում, լրագրողներին է ասել ԵՄ-ի բարձրաստիճան ներկայացուցիչը։
«Չեմ կարծում, որ որևէ քննարկում կլինի։ Ինչու՞ եմ այդպես ասում, թեև կարող եմ սխալվել, որովհետև հիմնվում եմ ներկայացուցիչների բանակցությունների վրա»,- ասել է Եվրամիության ներկայացուցիչը` ցանկանալով չնշել իր անունը։
Նա ասել է, որ «բոլոր 28 պետությունները համոզված են, որ մարտյան եզրակացությունները, որոնք հստակ կապ են սահմանում Մինսկի համաձայնությունների կատարման և պատժամիջոցները երկարացնելու միջև, նախկինի պես գործում են»։
«Նշանակում է` բոլոր 28 երկրների առաջնորդները կողմ են, որ պատժամիջոցները վեց ամսով երկարացվեն»,- հայտարարել է ԵՄ ներկայացուցիչը։
Նա հիշեցրել է, որ «պատվիրակություններից մեկը բարձրացրել է ընթացակարգի հարցը, որին մենք պետք է հետևենք»։
«Դա արտացոլված է Եվրախորհրդի նախագահ Դոնալդ Տուսկի նամակում։ Պաշտոնական գործընթացը տեղի կունենա Եվրախորհրդից հետո մշտական ներկայացուցիչների մակարդակում։ Այդ հարցում մենք համաձայնության ենք եկել, որը կարտացոլվի օրենսդրական գործընթացում` սկսած ուրբաթ օրվանից։ Կարծում եմ, որ Coreper-ի նիստը կկայանա գագաթնաժողովից հետո»,- ասել է պաշտոնյան։
