Պուտինը հրահանգել է գործարկել Կուբանից Ղրիմ էներգակամրջի երկրորդ գիծը

Վլադիմիր Պուտինը գործարկել է Կուբանից Ղրիմ էներգակամրջի երկրորդ գիծը, ինչը թույլ է տվել Ղրիմի և ռուսական էներգահամակարգերը աշխատանքի միասնական ռեժիմ տեղափոխել։
 
«Ցանկանում եմ բոլորին շնորհակալություն հայտնել այն աշխատանքի արագ տեմպերի համար, որը կատարվել է կարճ ժամկետում,  և հուսով եմ` պատշաճ որակով»,– ասել է Պուտինը Կուբանից Ղրիմ էներգակամրջի երկրորդ գծի գործարկումից հետո։
 
Վլադիմիր Պուտինը տեսակամրջի ընթացքում նշել է, որ Կուբանից էլեկտրաէներգիայի ևս երկու շղթայի գործարկումը, որը նախատեսված է ամռանը, կբավարարի Ղրիմի բոլոր պահանջները։

«Մենք պետք է լուծենք մյուս խնդիրները, որոնք ծառացած են մեր առջև, այն է` մինչև ամառ, ավելի ճիշտ` ապրիլին, ամենաուշը` մայիսին, պետք է ևս երկու էներգետիկ շղթա տանել Ղրիմի թերակղզի` այնտեղ առնվազն 800 մեգավատ էներգիա ապահովելու համար։ Դա կլուծի Ղրիմի բոլոր էներգետիկ հարցերը»,– ասել է երկրի նախագահը։

Էներգակամրջի երկրորդ գծի գործարկումը կտա ևս 230 ՄՎտ` զգալիորեն նվազեցնելով Ղրիմում էլեկտրաէներգիայի պակասը։ Այն նախատեսվել է անցկացնել մինչև դեկտեմբերի 20–ը, բայց դեկտեմբերի 9–ին տեղի ունեցած խորհրդակցության ժամանակ ՌԴ էներգետիկայի նախարար Ալեքսանդր Նովակը հաղորդել է, որ գործարկումը կլինի մինչև դեկտեմբերի 15–ը։
 
Ղրիմն ամբողջությամբ հոսանքազրկվել էր նոյեմբերի 22–ին` Ուկրաինայից եկող էլեկտրահաղորդիչ գծերի վնասման հետևանքով։ Ղրիմում և Սևաստոպոլում արտակարգ իրավիճակի ռեժիմ էր սահմանվել։