ԵՐԵՎԱՆ, 15 դեկտեմբերի — Sputnik. Ռուսաստանի արտգործնախարարի և ԱՄՆ պետքարտուղար Ջոն Քերիի հանդիպումը շուրջ 150 լրագրող էր լուսաբանում։ Նման իրարանցումը սովորական է Ռուսաստանի և ԱՄՆ-ի արտաքին գերատեսչությունների երկկողմ հանդիպումների ժամանակ։
Բանակցություններն ԱԳՆ-ի գրասենյակում սկսեցին հինգ րոպե ուշացումով։ Լավրովն ու Քերին մինչ բանակցությունների սեղանի մոտ նստելը միմյանց ձեռք սեղմեցին Ամերիկայի և Ռուսաստանի դրոշների ֆոնին։ Իսկ հետո ռուս նախարարը առանձին սեղմեց Քերիի տեղակալ Վիկտորյա Նուլանդի ձեռքը։ Նա ԱՄՆ պետդեպարտամենտում արևելաեվրոպական ուղղության, մասնավորապես Ուկրաինայի պատասխանատուն է։
Նախարարների յուրաքանչյուր ժեստն արձանագրում էին լուսանկարիչները, և լուսանկարչական սարքերի շրխկոցները չէին դադարում, ինչը ստիպեց Քերիին շրջվել, իսկ Լավրովին ընդհատել զրույցն ու կատակել. «Զարմանալի է, որ նոր տեխնոլոգիաների դարում մինչ օրս անաղմուկ սարքեր չեն հնարել»։
ԱՄՆ-ի պետքարտուղարը հոգնած տեսք ուներ. նա Փարիզից Մոսկվա էր ժամանել գիշերվա երեքին։ Ըստ նրա, «արդյունավետ» բանակցություններ էր ունեցել գործընկերների հետ։ Ավարտելով ողջույնի խոսքը` նա ռուսերեն շնորհակալություն հայտնեց Լավրովին։ Ընդ որում, Քերին հույս հայտնեց, որ Մոսկվայի հանդիպումը կօգնի առաջընթաց գրանցել մի շարք խնդիրներում, այդ թվում`սիրիական հարցում։
Բանակցություններից առաջ ԱԳՆ-ի շենքի բակում եռագույն կատու էր վազվզում։ Ռուսական հավատալիքների համաձայն, սա հաջողության նշան է, կատակեցին ռուս լրագրողները։
