ԵՐԵՎԱՆ, 15 դեկտեմբերի — Sputnik. Դեկտեմբերի 6-ին ՀՀ սահմանադրության փոփոխությունների հանրաքվեի ժամանակ 26/29 ընտրական տեղամասում ծառայություն իրականացնող ՀՀ ոստիկանության ծառայող Ա. Դ.-ն հայտնել էր, որ նույն օրը՝ ժամը 08:30-ին Քասախ գյուղի վարչական տարածքում տեղակայված ընտրական տեղամասում վիճաբանություն է տեղի ունեցել, որի ժամանակ կոտրել են քվեատուփը:
Նույն ընտրական տեղամասի ընտրական հանձնաժողովի անդամ Վ. Դ.-ն իր հերթին հաղորդում էր տվել, որ 08:30-ի սահմաններում նկատել է, թե ինչպես տեղամասային ընտրական հանձնաժողովի անդամներից մեկը քվեատուփի մեջ կեղծ քվեաթերթիկներ գցել, ինչից վրդովվելով ինքը վերցրել է քվեատուփը, գցել է հատակին, որի հետևանքով այն վնասվել է:
Ինչպես հայտնում է ՀՀ քննչական կոմիտեն, հանրաքվեի հանձնաժողովի աշխատանքին խոչընդոտելու դեպքի առթիվ ՀՀ քննչական կոմիտեի Կոտայքի մարզային քննչական վարչությունում ՀՀ քրեական օրենսգրքի 149-րդ հոդվածի 1-ին մասի հատկանիշներով հարուցված քրեական գործն ընդունվել է ՀՀ հատուկ քննչական ծառայության վարույթ:
Նախաքննությունը շարունակվում է:
