Ֆրանսիայի նախկին նախագահ Նիկոլյա Սարկոզին ու «Ազգային ճակատ» կուսակցության առաջնորդ Մարին Լը Պենը մեկնաբանել են շրջանային ընտրությունների արդյունքները և ներկայացրել կուսակցության հետագա ծրագրերը։
Նիկոլյա Սարկոզիի «Հանրապետականներ» կուսակցությունը Ֆրանսիայի 7 շրջաններից երեքում հաղթել է, իշխող Սոցիալիստական կուսակցությունը հաղթել է հինգում, Մարին Լը Պենի աջակողմյան «Ազգային ճակատը» պարտվել է բոլոր շրջաններում։ Այս մասին հայտնում են ֆրանսիական BFMTV և iTele հեռուստաալիքները։
Շրջանային ընտրությունների արդյունքում 17 տարվա ընթացքում առաջին անգամ «Հանրապետականները» կգլխավորեն Իլ դը Ֆրանս շրջանը, ինչպես նաև Պրովանս-Ալպեր-Լազուր ափ, Նոր-Պա-դը-Կալե-Պիկարդիա, Նորմանդիա, Էլզաս-Շամպան-Արդեններ-Լոթարինգիա, Օվերն-Ռոնա-Ալպեր և Պեի դը լա Լուար շրջանները։
Շրջանային ընտրությունների երկրորդ փուլի արդյունքում Մարին Լը Պենի գլխավորած ծայրահեղ աջակողմյան կուսակցությունը զիջել է Ֆրանսիայի բոլոր շրջաններում։ Այդուհանդերձ, կուսակցության առաջնորդը գոհ է ընտրությունների արդյունքներից։
«Ազգային ճակատը», եռապատկելով շրջանային խորհրդատուների քանակը, կդառնա առաջին ընդդիմադիր կուսակցությունը Ֆրանսիայի շրջանային խորհուրդներից շատերում, կլինի կառուցողական և ստեղծագործող ընդդիմություն», — հայտնել է Լը Պենը` ելույթ ունենալով կուսակցության կողմնակիցների համար։
Նրա խոսքով` ընտրությունների արդյունքները կրկին ցուցադրել են երկրի քաղաքական կառուցվածքը, որը բաժանված է երկու մասի` Ազգային ճակատի կողմնակիցներ և հակառակորդներ։
