ԵՐԵՎԱՆ, 11 դեկտեմբերի – Sputnik. «Կարապի լճի» սահադաշտը լցվել է երաժշտությամբ: Արամ Խաչատրյանի «Դիմակահանդես» բալետի վալսի հնչյունների ներքո սահում են տասնյակ գեղասահորդները։ Նրանք հայկական գեղասահքի ապագան ու հույսն են, նշում են Իրինա Ռոդնինայի անվան գեղասահքի դպրոցի մարզիչները։
Սահադաշտում տարբեր տարիքի մոտ 30 երեխա կա։ Նրանցից երեքը սպասում են իրենց հերթին, մինչդեռ մեծերը պատկերներ են նկարում սառույցի վրա։ «Ի՜նչ գեղեցիկ են պարում», – հիացած ասում է մի աղջիկ։ «Իսկ ինձ թվում է՝ լուսավորությունն այստեղ լավը չէ, խնայել են երևի», – ասում է աղջկա ձեռքն ամուր բռնած երիտասարդը։
Անկախ սառնամանիքից, հյուրերն ու մայրաքաղաքի բնակիչները եկել են սահադաշտի բացմանը։ Սահադաշտի կախարդանքով հիանալու են եկել թե՛ փոքրիկները, թե՛ երիտասարդները, թե՛ մեծահասակները։ Ոչ ոք չի էլ մտածում մրսելու մասին։ Միմյանց հետ գրեթե չեն խոսում։ Բոլորը կլանված դիտում են։
«Մեր ժողովուրդը շատ է սիրում այս մարզաձևը։ Կարևորը՝ մարդիկ հասկանում են, որ այն օգտակար է առողջության համար», – Sputnik Արմենիայի հետ զրույցում ասաց Երևանի Գեղասահքի և տափօղակով հոկեյի մանկապատանեկան մարզադպրոցի ուսմասվար Աստղիկ Բարսեղյանը։
Ամեն տարի Երևանի կենտրոնում` նույն տեղում, բացվում է բոլորին ոգեշնչող սահադաշտը, որտեղ կարող են սահել և իրենց գեղասահորդ զգալ ինչպես մեծերը, այնպես էլ՝ փոքրերը։ Երևանի քաղաքապետարանը հայտնում է, որ սահադաշտը գործելու է ամեն օր։
