ԵՐԵՎԱՆ, 11 դեկտեմբերի – Sputnik. Մերձավոր Արևելքի իրադարձություններն ուղղված են ԱՄՆ–ի գերիշխանության պահպանմանը տարածաշրջանում, Sputnik Արմենիա մամուլի կենտրոնում «Անվտանգությունը կովկասյան տարածաշրջանում. «Իսլամական պետության» գործոնը» Մոսկվա–Երևան տեսակամրջի ժամանակ ասաց «Ռուսաստան–Կովկաս» աշխարհաքաղաքական կենտրոնի տնօրեն Նիկոլայ Բանինը։
Նա նշեց, որ Թուրքիան Հյուսիսային Իրաքում զորքի քանակի հնարավոր ավելացման մասին իր հայտարարություններով ցանկանում է ցույց տալ, որ իր համար նշանակություն չունեն Իրաքի իշխանությունների հայտարարությունները և միջազգային կազմակերպությունների դիրքորոշումը։
«Միջազգային իրավունքը դարձել է զուտ ԱՄՆ–ի շահերը առաջ տանող գործիք։ ԱՄՆ-ն ապակայունացնում է իրավիճակը Մերձավոր Արևելքում, աջակցում արմատականներին։ ԴԱԻՇ–ի դեմ պայքարը պարզապես իմիտացիա է` նախատեսված հասարակության լայն շրջանակների համար։ Այս պայմաններում իրենց խաղն են սկսում վարել տարածաշրջանի գերտերությունները։ Օրինակ` Իրանն ու Սաուդյան Արաբիան։ Սիրիան նրանց համար ուղիղ ռազմական բախումների հարթակ է դարձել։ Այս իրավիճակից նույնպես կօգտվի Թուրքիան», – կարծում է Բանինը։
Նրա կարծիքով` Թուրքիայի նախագահ Թաիպ Էրդողանը առաջ է տանում նեոօսմանիզմի գաղափարը, նա շահագրգռված է Դամասկոսի իշխանության անկմամբ։
Բանինը կարծում է, որ Թուրքիան նախատեսում է Սիրիայում Հյուսիսային Կիպրոսի նման պետություն ստեղծել կամ ԴԱԻՇ–ի կողմից Դամասկոսի զավթման պարագայում «ազատել» այն ահաբեկիչներից` իր ազդեցությունը հաստատելով տարածաշրջանում։
