ԵՐԵՎԱՆ, 10 դեկտեմբերի — Sputnik. Թեև Հայաստանցի բնակչության 63,35%-ը կողմ է քվեարկել սահմանադրական փոփոխություններին, այնուհանդերձ 32,35%-ն անվստահությամբ ու վախով է նայում երկրի «խորհրդարանական» ապագային։ Ընդդիմությունը հայտարարում է, որ խախտումներ են եղել և բողոքարկում է ընտրության արդյունքները։
ՀՀԿ խմբակցության պատգամավոր Մարգարիտ Եսայանը Sputnik Արմենիա ռադիոկայանի եթերում խոսել է նոր փոփոխությունների ուժի մեջ մտնելու մասին և նշել, որ Սահմանադրության փոփոխությունները պետք է երկար ճանապարհ անցնեն։
«Ներկա սահմանադրությունը կգործի մինչև պատգամավորական հաջորդ ընտրությունները, որոնք կանցկացվեն 2017 թվականի մայիսին։ Սահմանադրական փոփոխություններին երկիրը կբախվի այն ժամանակ, երբ համամասնական ընտրակարգով կանցկացվեն խորհրդարանական ընտրությունները։ Դրանից հետո վերափոխված սահմանադրությամբ ձևավորված նոր խորհրդարանը կսկսի իր գործունեությունը` կընտրի վարչապետին, Հայաստանի խորհրդարանի նախագահին և այլն»,- ասաց նա։
Եսայանի խոսքով` թեև խորհրդարանը կսկսի գործել փոփոխված սահմանադրության շրջանակում, այնուհանդերձ մինչև գործող նախագահ Սերժ Սարգսյանի պաշտոնավարման ավարտը (2018 թվական)օրենսդիր մարմնի որոշ լիազորություններ ուժի մեջ չեն մտնի։
«Հայկական վերածնունդ» հասարակական-քաղաքական միավորման հիմնադիր Արթուր Բաղդասարյանը հայտարարել է, որ մասնակցության ոչ բարձր ցուցանիշն (50,51%) ու հանրաքվեի անհամոզիչ տվյալները ցույց են տալիս, որ բնակչության զգալի մասը դեմ է փոփոխություններն և քվեարկությանը չմասնակցելու միջոցով է իր «ոչ»-ը հայտնել։
