ԵՐԵՎԱՆ, 8 դեկտեմբերի- Sputnik. Eagles of Death Metal կալիֆոռնիական ռոք խումբը դեկտեմբերի 8-ին այցելել է Փարիզի «Բատակլան» թատրոն, որտեղ նոյեմբերի 13-ին ահաբեկչական գործողություն էր իրականացվել։
Eagles of Death Metal խումբը նոյեմբերի 13-ին ելույթ էր ունենում «Բատակլան» թատրոնում, երբ անհայտ անձինք ներխուժեցին շենք և կրակ բացեցին։ Ահաբեկչության հետևանքով մահացավ 89 մարդ, այդ թվում` խմբի երաժշտական մենեջեր Նիկ Ալեքսանդերը։ Ավելի վաղ Eagles of Death-ի առաջնորդ Ջեսի Հյուզը հայտարարել էր, որ խումբը մտադիր է կրկին համերգ տալ «Բատակլան» թատրոնում, որի բացումը նախատեսված է 2016թ.-ի վերջին։
Նոյեմբերի 13-ին Փարիզում միանգամից մի քանի ահաբեկչական գործողություն էր իրականացվել: Անհայտ անձինք կրակ էին բացել մայրաքաղաքի 10-րդ շրջանի ռեստորաններից մեկի ուղղությամբ, երեք պայթյուն էլ որոտացել էր «Սթադ դը Ֆրանս» մարզադաշտի անմիջական հարևանությամբ: Այդ պահին մարզադաշտում ընթանում էր Ֆրանսիա-Գերմանիա ֆուտբոլային հանդիպումը, որին ներկա էր նաև նախագահ Ֆրանսուա Օլանդը: Պայթյուն էր գրանցվել նաև «Բատակլան» թատրոնում, որտեղ անհայտ անձինք պատանդ էին վերցրել տասնյակ մարդկանց: Մահացել է 130 մարդ:
