ԵՐԵՎԱՆ, 8 դեկտեմբերի- Sputnik. Լեոնարդո դա Վինչիի ամենահայտնի նկարի` «Մոնա Լիզայի» տակ ֆրանսիացի գիտնական Պասկալ Կոտը ևս մեկ դիմանկար է հայտնաբերել, հայտնում է ՌԻԱ Նովոստին` հղում անելով BBC-ին:
Պասկալ Կոտն նկարն ուսումնասիրելու համար եզակի լուսանկարչական խցիկ է օգտագործել, ավելի քան 10 տարի ծախսել տվյալների վերլուծության վրա, նշում է BBC-ն։
Գիտնականի բացահայտած դիմանկարում կինը մի կողմ է նայում, և հայացքն էլ այնքան խորհրդավոր չէ, որքան Լուվրում ցուցադրվող դիմանկարինը։ Բացի այդ, թաքնված նկարի կերպարը չունի այն առեղծվածային ժպիտը, որն ավելի քան 500 տարի քննարկում են արվեստասերները։
Վերջին կես դարում «Ջոկոնդան» ենթարկվել է տարբեր գիտափորձերի։ Պասկալ Կոտը հայտարարում է, որ իր սարքը կարող է ավելի խորն ուսումնասիրել կտավը։
«Հիմա մենք կարող են ստույգ վերլուծել, թե ինչ է տեղի ունենում նկարի շերտերի տակ և «վերհանել» դրանք։ Մենք կարող ենք վերականգնել կտավի ստեղծման ժամանակագրությունը»,- ասել է ֆրանսիացի արվեստաբանը։
Լուվրը չի մեկնաբանել Պասկալ Կոտի հայտարարությունները, ասվում է հոդվածում։
