ԵՐԵՎԱՆ, 8 դեկտեմբերի — Sputnik. WBO վարկածով աշխարհի չեմպիոն Արթուր Աբրահամը լրագրողների հետ խոսեց իր անձնական կյանքի մասին։
«Ես ամուսնացել եմ կես տարի առաջ, կնոջս անունը Մերի է։ Նա Երևանի պետական համալսարանի ուսանող է», — խոստովանեց Աբրահամը։
Նրա խոսքով` չի ցանկացել հանրայնացնել այս իրադարձությունը, որպեսզի ԶԼՄ-ների ուշադրության կենտրոնում չհայտնվի։
«Այժմ կարող եմ հանգիստ խոսել։ Հարսանեկան արարողությունը տեղի է ունեցել Հայաստանում վեց ամիս առաջ», — ասաց Աբրահամը։
Նա խոստովանեց, որ հաճախակի բացակայությունները, ուղևորություններն ու մարզումները տարվա մեջ ութ ամիս են զբաղեցնում, մեծ մասամբ չի կարողանում տանը լինել, ինչը որոշակի դժվարություններ է ստեղծում երիտասարդ զույգի համար։ Երեխայի դեռ չեն սպասում, բայց Աբրահամը նշում է, որ երեք երեխա է ուզում ունենալ։
Գերմանիայում բնակվող բռնցքամարտիկը մտադիր է Հայաստանում անցկացնել ևս չորս շաբաթ և այստեղ նշել Ամանորը։
«Ես ուզում եմ Նոր տարին նշել Հայաստանում, ընտանիքիս հետ, թող նրանք որոշեն, թե որտեղ կանցկացնենք այդ տոնը։ Ամեն դեպքում ես կընդունեմ նրանց ցանկացած որոշումը», — ասաց Աբրահամը։
Աբրահամը նաև պատմեց, որ մտադիր է մյուս մենամարտն անցկացնել 2016 թվականի մարտին մեքսիկացի բռնցքամարտիկ Ժիլբերտո Ռամիրեսի հետ, որը մինչ օրս ոչ մի պարտություն չի կրել։
Ինչ վերաբերում է կարիերային, ապա բռնցքամարտիկն առնվազն երկու տարի չի պատրաստվում հեռանալ սպորտից։
Արթուր Աբրահամը երեք շաբաթ առաջ 33-ամյա բրիտանացի Մարտին Մյուրեյի հետ մենամարտում պաշտպանեց WBO գոտին։ 35-ամյա Աբրահամի համար այդ հաղթանակը 44-րդն էր (որից 29-ը` նոկաուտով)։
Արթուր Աբրահամը (իսկական անունը` Ավետիք Աբրահամյան) կարիերան սկսել է Հայաստանում, սակայն 90-ականների կեսերին ընտանիքի հետ տեղափոխվել է Գերմանիա, որտեղ կարիերան շարունակել է գերմանական դրոշի ներքո։
Բռնցքամարտիկին շատ են սիրում Հայաստանում։ Ամեն մենամարտից հետո նա վերադառնում է հայրենիք, որտեղ, նրա խոսքով, «իսկապես հանգստանում» է։
