ԵՐԵՎԱՆ, 8 դեկտեմբերի-Sputnik. Գոհար Սարգսյան. H1N1 գրիպի համաճարակը 28 մարդու կյանք է խլել Քերման նահանգում, իսկ 5-ը մահացել են Բելուջիստան և Սիստան նահանգներում: Իրանի առողջապահության նախարարությունը զգուշացրել է, որ վարակը կարող է տարածվել երկրի մյուս նահանգներում, այդ թվում` Թեհրանում:
Sputnik Արմենիան հետաքրքրվեց, թե Իրանի համաճարակային իրավիճակն ինչ ազդեցություն կարող է ունենալ հարևան Հայաստանում, որտեղ տարեկան մեծ թվով իրանցիներ են ժամանում:
«Եթե դա որևէ սպառնալիք ներկայացներ հարևան պետությունների համար, Առողջապահության համաշխարհային կազմակերպությունը հայտարարությամբ հանդես կգար: Տեղեկացնեմ, որ H1N1-ը գրիպի ենթատեսակ է, որը վախենալու չէ, եթե մարդն ունի բարձր դիմադրողականություն, իսկ վարակվելու դեպքում ինքնաբուժման չի դիմում: Ավելացնեմ նաև, որ Հայաստանում սուր շնչառական հիվանդությունների համաճարակային իրավիճակը կայուն է, ավելին` նախորդ տարվա նույն ժամանակահատվածի համեմատությամբ ունենք ցածր հիվանդացություն»,-ասաց ԱՆ հիվանդությունների վերահսկման և կանխարգելման ազգային կենտրոնի համաճարակաբանության բաժնի պետ Լիանա Թորոսյանը:
2009 թվականին H1N1-ի հետևանքով Հայաստանում գրանցվել է մահվան 3, 2010-ին` 2, իսկ 2011-ին 3 դեպք: Մասնագետները հորդորում են գրիպի ցանկացած տարատեսակով հիվանդների հետ շփվելիս պահպանել հիգիենայի կանոնները, հաճախակի սենյակներն օդափոխել, շատ հեղուկ խմել: Իսկ առավել արդյունավետ տարբերակ է պատվաստումը:
«Հայաստանում ներկրվել է բազմակոմպոնենտ պատվաստանյութ, որը մարդուն 6 ամսից մինչև 1 տարով ապահովագրում է գրիպի 3 ենթատեսակով, այդ թվում նաև H1N1-ով հիվանդանալուց: Կամավոր հիմունքներով կարող են պատվաստվել բոլորը` դիմելով տեղամասային պոլիկլինիկա»,-հաղորդում է Լիանա Թորոսյանը:
Մեր զրուցակիցը չի զլանում մեկ անգամ էլ հիշեցնել, որ գրիպի դեպքում հակաբիոտիկներ օգտագործելն արգելվում է. գրիպը վիրուսային բնույթի է, իսկ հակաբակտերիալ դեղամիջոցն այդ դեպքում որևէ ներգործություն չի ունենա:
H1N1-ը կամ խոզի գրիպը հատուկ ախտանշաններ չունի: Հիվանդն ունենում է մկանացավ, հոդացավ, բարձր ջերմություն, ինչպես բոլոր սուր վարակիչ հիվանդությունների դեպքում: Միայն թե բարդություններից խուսափելու համար ցանկացած հիվանդություն աչքաթող անել պետք չէ:
