ԵՐԵՎԱՆ, 7 դեկտեմբերի– Sputnik. Հայաստանն անցում է կատարում քաղաքական զարգացման նոր փուլ, այդ մասին Facebook սոցիալական ցանցի իր էջում գրել է Ռուսաստանի Դաշնության միջազգային հարցերի հանձնաժողովի նախագահ Կոնստանտին Կոսաչյովը` մեկնաբանելով նախօրեին տեղի ունեցած սահմանադրական բարեփոխումների հանրաքվեի արդյունքները։
Հայաստանի ԿԸՀ նախնական տվյալներով` Հայաստանում սահմանադրական փոփոխությունների հանրաքվեին քվեարկողների մեծամասնությունն աջակցել է բարեփոխումներին։ Սահմանադրական բարեփոխումներին «այո» է ասել ընտրողների 63,35 տոկոսը, «ոչ»` 32,35 տոկոսը։ Սահմանադրության գլխավոր փոփոխությունը կառավարման խորհրդարանական համակարգին անցում կատարելն է և խորհրդարանում մեծամասնական համակարգից հրաժարվելը (մասնակցել կարող են միայն կուսակցությունները)։
«Հայաստան, հանրաքվե, անցում կառավարման խորհրդարանական ձևի։ Ոչ բարձր մասնակցություն, բայց համոզիչ արդյունք` սատարելով նախագահի նախաձեռնած բարեփոխումներին։ Մեզ մտերիմ երկիրը թևակոխում է քաղաքական զարգացման նոր փուլ։ Խաղաղ և առանց դրամատիզմի, ամեն դեպքում այսօրվա դրությամբ (Երևանում տեղի ունեցած վերջին իրադարձությունները դեռ չեն ջնջվել հիշողությունից)»,– գրել է Կոսաչյովը։
Նրա կարծիքով` միայն ժամանակը ցույց կտա, թե ինչպես կաշխատի նոր մոդելը։
«Հաջողություն ենք մաղթում բարեկամ ժողովրդին։ Հիշում ենք Սպիտակի ողբերգության տարելիցը»,– ասաց Կոսաչյովը։
Հայաստանի ԿԸՀ տվյալներով` հանրաքվեին մասնակցել է հանրապետության քաղաքացիների 50,51 տոկոսը, որոնք ներառված են քվեարկության ցուցակներում։
