ԵՐԵՎԱՆ, 7 դեկտեմբերի – Sputnik. Հայաստանի վարչապետ Հովիկ Աբրահամյանն այսօր՝ դեկտեմբերի 7-ին, այցելել է Գյումրի: Sputnik Արմենիայի թղթակիցը ռադիո Sputnik-ին հայտնել է, որ վարչապետն անդրադարձել է դեկտեմբերի 6-ին կայացած հանրաքվեի ընտրախախտումներին և գյումրեցիներին տրամադրվող բնակարանների խնդրին:
Հիշեցնենք, որ դեկտեմբերի 6-ին Հայաստանում սահմանադրական փոփոխությունների համապետական հանրաքվե է անցկացվել: ԿԸՀ-ի նախնական տվյալով՝ 825 851 քաղաքացի «այո» է քվեարկել այդ փոփոխություններին, իսկ 421 600-ը՝ «ոչ»: Ընդդիմությունը պնդում է, որ պետք է չեղյալ հայտարարել ընտրության արդյունքները` համոզված, թե դրանք կեղծվել են:
«Այնտեղ, որտեղ ընտրախախտումներ են եղել, ուրեմն այդ խախտումներն արած մարդիկ արջի ծառայություն են մատուցել և անպայման օրենքի սահմաններում պատասխանատվություն կկրեն»,- ասել է ՀՀ վարչապետը Գյումրիում:
«Ես չգիտեմ՝ այդպիսի մարդիկ կան,թե ոչ: Նախնական տվյալով՝ մեր քաղաքացիների մոտ 62, 63 տոկոսն «այո» է ասել, իսկ դա 1000, 5000, 10 000 ձայնի տարբերություն չէ: Պարզապես սպասենք, կբացվեն տեղամասերը, կստուգվեն, եթե կլինեն բողոքներ, համոզված եմ` պատկան մարմիններն օրենքի շրջանակում ամեն ինչ կանեն, որպեսզի, եթե կան այդպիսի մարդիկ, պատասխանատվության ենթարկվեն»,- վստահեցրել է վարչապետը:
Այնուհետև Հովիկ Աբրահամյանն անդրադարձել է գյումրեցիներին տրամադրվող բնակարանների խնդրին:
«Այս տարի շուրջ 250 բնակարան ենք տրամադրելու Գյումրու քաղաքացիներին: Համոզված եմ՝ 2017-2018 թվականներին մենք լիովին կլուծենք բնակարանների խնդիրը»,- նշել է վարչապետը:
