ԵՐԵՎԱՆ, 6 դեկտեմբերի– Sputnik. Սահմանադրական բարեփոխումների հանրաքվեն ավարտվեց, ընտրատեղամասերը փակվեցին, ընթանում է ձայների հաշվարկը։
Կենտրոնական ընտրական հանձնաժողովի տվյալներով` ժամը 17։00–ի դրությամբ ընտրողների մասնակցությունը կազմել է 39,17 տոկոս։
Հայաստանի ողջ տարածքում ձևավորվել է 1997 ընտրատեղամաս, որտեղ հանրաքվեի ընթացքում կարող է քվեարկել 2 միլիոն 550 հազար 323 քաղաքացի: Հանրաքվեին հետևել են տեղական և միջազգային դիտորդներ, լուրջ խախտումներ չեն արձանագրվել։
Չնայած նրան, որ հանրաքվեին ընտրողների մասնակցության շեմ չկա, դրա որոշումը կարող է օրենսդրորեն ընդունվել միայն այն դեպքում, եթե ընտրություն է կատարել գրանցված ընտրողների մեկ քառորդից ոչ պակասը։ Սահմանադրության փոփոխությունների նախագիծը կընդունվի, եթե դրա օգտին քվեարկի ընտրողների 50 տոկոսից ավելին։
