ԵՐԵՎԱՆ, 6 դեկտեմբերի — Sputnik. Sputnik Արմենիան հարցում է անցկացրել ՀՀ քաղաքացիների շրջանում` պարզելու համար, թե ով ինչպես է կատարել իր քաղաքացիական պարտքը և ինչ ակնկալիքներ ունի փոփոխություններից։
9/19 ընտրատեղամասում քվեարկությանը մասնակցած Գարեգինը նշում է. «Այնպես չէ, որ նոր սահմանադրությունն ընդունվեց, վաղը շատ լավ կյանքով ենք ապրելու։ Նույնիսկ եթե ամենալավ սահմանադրությունն ընդունենք, որոշակի ժամանակ է պահանջվում, որպեսզի ամեն ինչ կարգավորվի։ Եթե անգամ կարգավորման հիմքերը դրվեցին, կրկին ժամանակ է պետք։ Մենք ուզում ենք, որ լավ լինի, բայց ամեն ինչ ցույց կտա ժամանակը։ Սահմանադրությունը, օրենքները լավ են գրվում, բայց պետք է ճիշտ կատարել։ Այստեղ կարևոր է մարդկային գործոնը, շատ կարևոր է, թե մարդիկ ինչպես են օրենքները կատարում»։
Տիկին Սաթենիկն էլ ասում է. «Ես բոլոր ընտրություններին վաղ առավոտյան եմ մասնակցում, բայց այսօր մի փոքր ուշացումով գնացի, քանի որ թոռնիկիս մոտ էի մնացել։ Շատ երջանիկ եմ, որովհետև թոռնիկս` 2 տարեկան Ռոզին, իմ ընտրությունն իր ձեռքով գցեց քվեատուփի մեջ, այսինքն նա տատիկի միջոցով որոշեց իր երջանիկ ապագան։
«Ես ոչնչի չեմ հավատում, ստիպված իմ պարտականությունը պետք է կատարեմ։ Քվեարկել եմ միայն նրա համար, որ ուրիշը իմ քվեաթերթիկը չօգտագործի»,- ասում է հանրաքվեին մասնակցած Գարեգին պապը։
Կարինեն էլ ընտրության է գնացել հանրաքվեի ավարտից երկու ժամ առաջ։
«Քանի որ հանգստյան օր է, տնային գործերս ավարտելուց հետո գնացի իմ քաղաքացիական պարտքը կատարելու։ Քվեարկել եմ հանուն մեր ազգի բարօրության, հետո էլ մեր քաղաքացիական պարտքը պետք է բոլորս կատարենք»,– ասում է երիտասարդ կինը։
Քվեարկությունն արդեն ավարտվել է, 20։00-ին փակվել են բոլոր ընտատեղամասերը, արդեն ամփոփվում են ընտրության արդյունքները, և շատ քիչ ժամանակ է մնացել հասկանալու համար, թե ինչ ուղղությամբ է զարգանալու երկրի ու բնակիչների ապագան։
