ԵՐԵՎԱՆ, 6 դեկտեմբերի —Sputnik. Հայաստանում ժամը 08։00-ից բացվել են բոլոր ընտրատեղամասերը։ Sputnik Արմենիայի թղթակիցն այս պահին թիվ 09/11 ընտրատեղամասում է, որը տեղակայված է թիվ 24 դպրոցում։
Այս ընտրատեղամասում հաշվառված է 1374 ընտրող:
Քվեաթերթիկների արկղը բացվել է, արդեն 7-8 հոգի սպասում է, որ ընտրություն կատարի։
Ավանդաբար հենց այս տեղամասում են քվեարկում երկրի առաջին դեմքերը։ 11։00-ին այստեղ քվեարկության կմասնակցի ՀՀ նախագահ Սերժ Սարգսյանը։
Վաղ առավոտյան ընտրատեղամաս եկած 70-ամյա Ռուբենն ասում է, որ ինքն անպայման պետք է մասնակցեր երկրի համար կարևոր այս իրադարձությանը և այդքան շուտ է եկել, որովհետև ուզում էր առաջիններից մեկը լինել։
Ընտրական հանձնաժողովի նախագահ Կարինե Նալբանդյանն էլ նշում է, որ իրենք պատրաստ են, վստահ են, որ որևէ խնդիր չի լինի, որովհետև ցուցակները ճշտված են։ Ընդհանուր առմամբ ամեն ինչ պատրաստ է ընտրությունների բարձր մակարդակ ապահովելու համար։
Հայաստանի ողջ տարածքում ձևավորվել է 1997 ընտրատեղամաս, որտեղ հանրաքվեի ընթացքում կարող է քվեարկել 2,552 միլիոն քաղաքացի:
