ԵՐԵՎԱՆ, 6 դեկտեմբերի —Sputnik. Հայաստանում առավոտյան 08։00-ին բացվել են բոլոր ընտրատեղամասերի դռները։ Հանրապետությունում սկսվել է հանրաքվեն։ Օրն, ինչ խոսք, պատմական է, այսօր Հայաստանի բնակիչները պետք է ընտրեն` կո՞ղմ են, թե՞ դեմ սահմանադրական փոփոխություններին։
Հայաստանի ողջ տարածքում ձևավորվել է 1997 ընտրատեղամաս, հանրաքվեի ընթացքում կարող է քվեարկել 2,552 միլիոն քաղաքացի:
Հանրաքվեին կհետևի 6 միջազգային և 18 տեղական դիտորդական կազմակերպություն, այդ թվում՝ 44-ը ԱՊՀ առաքելությունից, 23-ը՝ ԱՊՀ Միջխորհրդարանական վեհաժողովից, մեկը՝ Բելառուսի և Ռուսաստանի միության խորհրդարանական ժողովից, արտասահմանյան ԿԸՀ-երի 33 ներկայացուցիչ, 11 դիտորդ՝ Եվրոպայի խորհրդի խորհրդարանական ժողովից, 5 դիտորդ՝ ԵԱՀԿ Մարդու իրավունքների և ժողովրդավարական ինստիտուտների գրասենյակից, ինչպես նաև Հայաստանում հավատարմագրված դեսպանատների ներկայացուցիչներ: Հայաստանի 18 հասարակական կազմակերպությունից ԿԸՀ-ում գրանցված է ավելի քան 3 հազար դիտորդ:
