ԵՐԵՎԱՆ, 5 դեկտեմբերի- Sputnik, Լաուրա Սարգսյան. Արամ Խաչատրյանի անվան պետական ֆիլհարմոնիայի համերգասրահի փակ դռների հետևից երաժշտության ծանոթ հնչյուններ են լսվում: Սաքսոֆոնի նուրբ ելևէջները տակնուվրա են անում հոգիդ: Հայաստանի պետական երիտասարդական նվագախմբի երաժիշտները գեղարվեստական ղեկավար Սերգեյ Սմբատյանի և Պետական ջազային նվագախմբի անդամները՝ դիրիժոր Արմեն Հյուսնունցի գլխավորությամբ, վերջին փորձն են անում այսօրվա համերգից առաջ:
Նրանք պատրաստվում են հայ հանդիսատեսին ներկայացնել Արամ Խաչատրյանի ստեղծագործությունների նոր ու հետաքրքիր ջազային մեկնաբանությունը:
Թեև նախկինում «Ուլիխանյան» քառյակն արդեն ներկայացրել է Խաչատրյանի երաժշտության ժամանակակից մոտիվները, այնուհանդերձ այս համերգը նոր բացահայտումներ է խոստանում:
«Արամ Խաչատրյանի ստեղծագործություններում մեծ ջազային ներուժ կա: Շատ վտանգավոր և պատասխանատու քայլ ենք ձեռնարկել, քանի որ հանդիսատեսը սովոր է նրա երաժշտության դասական մեկնաբանությանը: Մենք փորձել ենք այդ երաժշտությանը նոր իմաստավորում տալ ջազի պրիզմայի միջոցով: Հանդիսատեսը պետք է պատրաստ լինի, որ ջազ է լսելու, ոչ թե Խաչատրյանի դասական երաժշտությունը»,- Sputnik Արմենիա պորտալի թղթակցին ասաց Արմեն Հյուսնունցը՝ ավելացնելով, որ իրենց նախաձեռնությունը ջազային միջավայրում հայկական ազգային երաժշտությունը տարածելու հերթական փորձն է:
Դեռ անցած դարի սկզբին ոչ ոք չէր կասկածում, որ աֆրիկյան և եվրոպական մշակույթների խաչմերուկում ծնված նոր երաժշտական ուղղությունը՝ ջազը, ընդամենը մեկ հարյուրամյակում կգրավի ողջ աշխարհը, և մարդիկ «կհիվանդանան» ջազային տենդով: Բացառություն չէր նաև Հայաստանը, որը բառացիորեն ողողվեց ջազային սվինգի ալիքներով:
Հայաստանի առաջին ջազային նվագախումբը Պետական ջազային նվագախումբն էր՝ կոմպոզիտոր և թավջութակահար Արտեմի Այվազյանի ղեկավարությամբ, դիրիժորն էր Ցոլակ Վարդազարյանը:
Այսօր ջազը քայլում է ժամանակին համընթաց, անցնում է տարբեր փոխակերպումների միջով: Մեկի համար ջազը կյանք է, մյուսի համար՝ հոգեվիճակ, երրորդի համար՝ պարզապես երաժշտություն:
«Ջազն աշխարհահայացք է: Ցավոք, այն, ինչ մատուցում են շատ երևանյան ակումբներում, այդ ուղղության մաքուր մեկնաբանությունը չէ: Ջազը նաև ինքնաբուխ իմպրովիզացիա է, որի հետևում մեծ իմաստ կա թաքնված: Հենց այդ միտքը կփորձենք հաղորդել Արամ Խաչատրյանի երաժշտության միջոցով»,- ասաց նա:
Այսօրվա համերգի հանդիսատեսը կկարողանա լսել ու տեսնել, թե ինչպես են նոր շունչ ստանում «Դիմակահանդեսը», «Սուսերով պարը», «Սպարտակն» ու մի շարք այլ ստեղծագործություններ:
