ԵՐԵՎԱՆ, 5 դեկտեմբերի- Sputnik. Արդեն մի քանի օր է՝ Պրիմորիեում այծը գիշերում է վագրի վանդակի մոտ և սկսում է ուտել միայն այն ժամանակ, երբ գիշատչին բաց են թողնում ընդհանուր այգի: Այս մասին հայտնել է այգու տնօրեն Դմիտրի Մեզենցևը:
Այծին որպես որս էին տարել ամուրյան վագրի մոտ, սակայն գիշատիչը չէր կարողացել ուտել նրան, որովհետև Տիմուրն արիաբար հակահարված էր հասցրել վագրին: Արդյունքում այծը նույնիսկ զբաղեցրել էր վագրի «ննջարանը» ՝ ստիպելով նրան քնել տանիքին: Երկու կենդանիների համատեղ կեցության ընթացքում վագրին պարբերաբար կերակրում են կենդանի ուտելիքով, և նա չի փորձում հարձակվել այծի վրա: Անցած հանգստյան օրերին այգու աշխատակիցները հայտնել էին, որ կենդանիները գիշերել են տարբեր վանդակներում, և գիշատիչը ողջ գիշեր ոռնացել է: Այգու ղեկավարությունը որոշել է, որ առայժմ նրանք առանձին են գիշերելու:
«Տիմուրը կրկին գիշերել է վագրի կողքին, նրա համար փոքր ծածկ ենք պատրաստել, ծղոտ փռել հատակին: Վագրին բաց ենք թողնում ընդհանուր այգի, և Տիմուրը սկսոմ է արածել. նրա ախորժակը բացվում է այն ժամանակ, երբ վագրի կողքին է լինում: Նա կարող է ավելի շուտ արածել, բայց կանգնում և սպասում է Ամուրին»,- պատմում է Մեզենցևը՝ մեկնաբանելով կենդանիների ընկերության մասին նոր տեսանյութը:
Համացանցում լուրեր են տարածվել, որ վագրն արդեն կերել է Տիմուրին, սակայն մասնագետը հերքել է այդ լուրը: «Հարցնում են՝ Տիմուրը վտանգի մեջ չէ՞: Ասեմ, որ այծի համար Ամուրի զոհը դառնալու ռիսկն ավելի քիչ է, քան կողք-կողքի ապրող մարդկանց համար»,- նշել է Մեզենցևը:
Նոր տեսանյութում վագրն ու այծը հանգիստ զբոսնում են միասին, Ամուրն ուրախանում է և խաղում կատվի պես, իսկ Տիմուրը հանգիստ արածում է նրա կողքին:
