Բեռլինի կենտրոնում հարյուրավոր մարդիկ ցույցի են դուրս եկել։ Նրանք դեմ են, որ Գերմանիան միջամտի սիրիական հակամարտության գործընթացին։ Դիտեք, թե ինչպես էր ընթանում բողոքի ակցիան
Ցուցարարների ձեռքերում պաստառներ են, որոնց վրա գրված է` «Ո՛չ բունդեսվերի մասնակցությանը Սիրիայի պատերազմին», «Կանգնեցրե՛ք բունդեսվերի առաքելությունը Սիրիայում», «Սիրիա, Աֆղանստան, Իրաք, Եմեն, վերջ տվեք ռազմական ահաբեկչությանը», «Հեռու մնացե՛ք Սիրիայից, ո՛չ Սիրիայի պատերազմին», «Բունդեսվեր Սիրիայո՞ւմ։ Ո՛չ, շնորհակալ ենք»։
Ակցիային մասնակցել է բունդեսթագի պատգամավոր Սառա Վագենկնեխտը, որը քննադատության է ենթարկել ԳԴՀ կառավարության որոշումը, որի համաձայն, բունդեսվերը պետք է մասնակցի «Իսլամական պետություն» ահաբեկչական խմբավորման դեմ պայքարին, հայտնում է գերմանական Die Welt պարբերականը։
Քաղաքական գործչի կարծիքով` Գերմանիայի մասնակցությունը «իսկական խելագարություն է» և կարող է Երրորդ համաշխարհային պատերազմի հանգեցնել ։
Դեկտեմբերի 4-ին բունդեսթագում քննարկվել է, որ գերմանացիները պետք է մասնակցեն Սիրիայում գործող «Իսլամական պետության» խմբավորման դեմ պայքարին։ Նախատեսվում է, որ բունդեսվերի առաքելությունը Սիրիայում կտևի մինչև 2016 թվականի դեկտեմբերի 31-ը, առաքելությանը կմասնակցի շուրջ 1200 զինծառայող, իսկ արժեքը կկազմի մոտ 134 մլն եվրո։ Բացի Tornado հետախուզական ինքնաթիռներից, վերալիցքավորման ինքնաթիռներից ու անօդաչու սարքերից, Գերմանիան նախատեսում է նաև գերմանական ռազմանավեր ուղղել Միջերկրական ծով ֆրանսիական «Շառլ դը Գոլին» ավիակրին աջակցելու համար։
