ԵՐԵՎԱՆ, 4 դեկտեմբերի – Sputnik. Վանաձոր-Ալավերդի ավտոճանապարհին դեկտեմբերի 4-ին` ժամը 12։00–ի շրջանում Թբիլիսիից Երևան ուղևորվող միկրոավտոբուսն ընկել է ձորը, Sputnik պորտալին հաղորդեց միկրոավտոբուսի վարորդ Ռազմիկ Գևորգյանը:
Երկու ուղևոր վնասվածք է ստացել։
Ինչպես խոստովանում է միկրոավտոբուսի վարորդ Ռազմիկ Գևորգյանը, պատճառը ճանապարհին մերկասառույցն է եղել։
«Մեքենան ընկել է երեք մետր խորությամբ ձորը։ Բոլորը ողջ են և արդեն այլ մեքենայով տեղափոխվել են Երևան։ Երկուսը թեթև վանսվածքներ են ստացել, բայց նրանց հետազոտել են Վանաձորի հիվանդանոցում և նույնպես ուղարկել են Երևան»,– ասել է նա։
Միկրոավտոբուսը դուրս է եկել Թբիլիսիից ժամը 9։00–ին։ Այն մասնավոր է և չի պատկանում կանոնավոր ուղևորափոխադրումներ կատարող որևէ ընկերության։
