ԵՐԵՎԱՆ, 4 դեկտեմբերի– Sputnik. Աֆղանստանում «Թալիբան» արմատական շարժման նոր առաջնորդ Մուլա Մանսուրը մահացել է վնասվածքներից, որոնք ստացել էր չորեքշաբթի փոխհրաձգության ժամանակ, հաղորդում է ՌԻԱ Նովոստին` հղում անելով Սինհուա գործակալությանը։
Ավելի վաղ հաղորդվել էր, որ թալիբների առաջնորդը ծանր վիրավորվել է, բայց փրկվել։
«Մանսուրը չորեքշաբթի ծանր վիրավորվել էր խմբավորման այլ դաշտային հրամանատարների հետ փոխհրաձգության ժամանակ»,– մեջբերում է գործակալությունն աֆղանական իշխանությունների ներկայացուցիչներին։
Ավելի վաղ շարժման մեջ աղբյուրները հաստատել են Մուլա Մանսուրի վիրավորվելու մասին տեղեկատվությունը` հաղորդելով, որ փոխհրաձգությունը տեղի է ունեցել Պակիստանի Կվետա քաղաքում Աբդուլա Սարհադիի` թալիբների դաշտային հրամանատար և ամերիկյան Գուանտանամո բանտի նախկին բանտարկյալի տանը։
Հուլիսի վերջին «Թալիբանը» պաշտոնապես հաստատել էր խմբավորման առաջնորդ Մուլլա Օմարի մահը, որի հետ կապված` Օմարի հետնորդ էր նշանակվել նրա տեղակալ Ախտար Մոհամեդ Մանսուրը։ Հաղորդվել էր, որ թալիբների որոշ հրամանատարներ հրաժարվել են ընդունել նոր առաջնորդին։
