ԵՐԵՎԱՆ, 3 դեկտեմբերի- Sputnik, Անի Լիպարիտյան. Առաջին ձյան ուրախությունը շատերի համար կարող է կարճատև լինել, որովհետև հենց փափուկ, եթերային ու անչափ հեքիաթային ձնով է սկսվում սայթաքել-ընկնելու «լավագույն» շրջանը։ Sputnik Արմենիա պորտալը հետևել է, թե ինչպես են մարդիկ այսօր տեղաշարժվել քաղաքում։
Ձմեռը Երևանում այս տարի չդավաճանեց օրացույցին, և ձմեռվա երրորդ օրը սկսվեց ձնով։ Փոքրիկներն ուրախացան, մեծերը ժպտացին, վարորդները դժգոհեցին, ձյան մաքրման գործով զբաղվող ծառայություններն անակնկալի եկան, իսկ զբոսաշրջիկները զարմացան փաթիլների մեծությունից։
Ասֆալտը ծածկած ձյունը, որն արագ ցեխի էր վերածվում, դժվարացրեց տեղաշարժվելը։ Մի կին հենց մեր աչքի առաջ սայթաքեց ու ընկավ, բայց բարեբախտաբար անվնաս ոտքի կանգնեց, թափ տվեց շորերը, ժպտաց և շարունակեց ճանապարհը։
«Շտապօգնության» ծառայությունից հայտնեցին, որ վնասվածքներով, կոտրվածքներով մարդիկ դեռ չեն դիմել իրենց։
Sputnik Արմենիա պորտալը փորձեց պարզել, թե ինչպես են մարդիկ արձագանքել առաջին ձյանը, և որքան է նրանց հաջողվել առանց չմուշկների «գեղասահքով զբաղվել» ասֆալտի վրա։
«Այնպե՜ս ընկա։ Ընդ որում, փողոցում շատ զգույշ էի քայլում։ Առանց պատահարների հասա աշխատավայր, մտա շենք և, քանի որ մարմարե հատակը թրջվել էր անցորդների ներս բերած ձնից, սայթաքեցի ու հայտնվեցի գետնին։ Ծնկացավով տեղ հասա»,- Sputnik-ին պատմեց Արմինեն` ցույց տալով նաև վնասված ձեռքը։
Ձյուն մաքրողները
Հովհաննեսն ու Նավասարդը Հանրապետության հրապարակում բահերով մաքրում են աստիճանների ձյունը։
«Մենք սիրում ենք ձմեռը։ Ինչու՞ չէ։ Տրամադրություն է ստեղծում։ Երբ իմ թոռն ուրախությունից գոռում է` պապի՜, պապի՜, ձյուն է եկել, ես ինչպե՞ս կարող եմ չուրախանալ։ Իսկ ձյունը մաքրում ենք, որ մարդիկ չընկնեն»,- ասում է Նավասարդը։
Նա ասում է, որ տրամադրությունը եղանակի հետ կապ չունի, եթե փող ունես, տրամադրությունդ էլ հարյուր աստիճան կլինի։ Նավասարդը խոստովանում է, որ «էկզոտիկ» աշխատանք են կատարում, քանի որ հիմնականում զբաղվում են քաղաքի կանաչապատմամբ։
Քաղաքի տրամադրությունը
Ակամայից ուզում ես երգել. «Ձյունը գալիս է դանդաղ, ձյունը իր երգն է երգում…»
Սոնան փողոցում ձեռագործ զարդեր է վաճառում, ու ձյունը չի խանգարում նրան, ասում է` գլխավորը երազանք ունենալն է, իսկ նրա երազանքը որդուն ամուսնացնելն է ու հարսանիքի համար գումար հավաքելը։
Երիտասարդ աղջիկը խոստովանեց, որ ձյուն շատ է սիրում։ «Պաշտում եմ ձյունը։ Նախընտրում եմ ձմեռն ու ցուրտը, քան ամառվա շոգը»,- ժպտալով ասաց աղջիկը և շարունակեց ճանապարհը` ամուր հենվելով կողքի երիտասարդին, որի մռայլ դեմքից կարելի էր հասկանալ, որ բոլորովին չի կիսում աղջկա ուրախությունը։
Իսկ պաղպաղակ վաճառողի դժգոհությանն ընդհանրապես չափ չկար. նրա բիզնեսի թիվ մեկ թշնամին ձմեռն է։
Տաքսի- տաքսի
Իսկ այ տաքսիստների ուրախությանը չափ չկա` առատ ձյունն ավելացրել է ուղևորների թիվը։
«Ամեն եղանակ իր գեղեցկությունն ունի։ Ես գիտեի, որ ձյուն է գալու, քանի որ մեքենայում միշտ լսում եմ լուրերը։ Ես պատրաստվել եմ ձմռանը, փոխել եմ անվադողերը, էնպես որ ճանապարհին խնդիրներ չեմ ունեցել»,- ասաց վարորդ Աշոտը։
«Ես գալիս եմ Աբովյանից։ Այնքան ձյուն էր եկել, որ կարելի էր դահուկ քշել։ Բայց եղանակը վտանգավոր է։ Այսօր Երևանում երեք ավտովթար եմ տեսել։ Ձմեռը ոմանց հանկարծակիի բերեց, ոչ բոլոր վարորդները հասցրեցին նախապատրաստվել»,- ասաց Սերգեյը։
Երեք ուսանողների զրույցը
Երթուղային տաքսի նստեցին թաց ու սառած ուսանողները և սկսեցին խոսել ձմռան լավ ու վատ կողմերի մասին։
— Օֆ, ի՜նչ եղանակ է։ Նման ցրտի ժամանակ բոլորը պիտի անվճար հանգստանալու իրավունք ունենան,- ասաց նրանցից մեկը։
— Իսկ ես պաշտում եմ ձմեռը, շուտով Նոր տարի է,- ասաց մյուս ուսանողուհին։
— Ի՞նչ Նոր տարի։ Դա տոն չէ, այլ` ծախսերի բուն,- ավելացրեց տղան։
— Դե պետք է ավելի քիչ ուտել, այդ դեպքում ծախսերը կքչանան,- հեգնեց համակուրսեցին։
Զրույցը մի քիչ տխուր երանգ ստացավ, և ուսանողները որոշեցին, որ նման եղանակին ավելի լավ է արջի քուն մտնել, որպեսզի չնկատեն ցուրտը, քննություններն ու ֆինանսական խնդիրները։
