ԵՐԵՎԱՆ, 3 դեկտեմբերի- Sputnik. Վրաստանի ՆԳՆ ղեկավար Գեորգի Մհեբրիշվիլիի նախաձեռնությամբ Վրաստանում կարգելեն աջ ղեկ ունեցող ավտոմեքենաների գրանցումը, գրում է Sputnik Գրուզիան։
Դեռևս պարզ չէ, թե սահմանափակումները երբվանից կգործեն։ Սակայն Վրաստանի ներքին գործերի նախարարի խոսքով` նորամուծությունը չի վերաբերի այն ավտոմեքենաներին, որոնք գրանցվել են նոր կարգավորման ուժի մեջ մտնելուց առաջ։
«Այն անձինք, ովքեր աջ ղեկով և տեղափոխված ղեկով ավտոմեքենաներ ունեն, կարող են հանգիստ վարել իրենց մեքենաները։ Ուղղակի երբ մենք օր որոշենք, այդ օրից կարգելվի աջ ղեկով մեքենաների գրանցումը»,- դեկտեմբերի 3-ին կառավարության նիստում ասել է Գեորգի Մհեբրիշվիլին։
Ավելի վաղ աջ ղեկով ավտոմեքենաների համար նախատեսված սահմանափակումների մասին խոսել էր նաև Թբիլիսիի քաղաքապետ Դավիթ Նարմանիան։ Նա ասել էր, որ աջ ղեկով ավտոմեքենաները խանգարում են տրանսպորտի նորմալ երթևեկությանը, իսկ նման ավտոմեքենաների սեփականատերերը քննադատել էին քաղաքապետի ասածը։ Մասնավորապես, Վրաստանի ավտոսպորտի ֆեդերացիայի փոխնախագահ Մևլութ Մելաձեն հայտարարել էր, որ աջ ղեկով ավտոմեքենաների արգելքը չի կարգավորի երկրի ճանապարհների վիճակը։
Վրաստանի վիճակագրության ազգային ծառայության տվյալով` 2014թ.-ին Ճապոնիայից ներկրված աջ ղեկով ավտոմեքենաների քանակը կազմել է Վրաստան մտնող ավտոմեքենաների ընդհանուր թվի 40 տոկոսը։
