Թուրքիայի նախագահ Ռեջեփ Թայիփ Էրդողանը զրպարտություն է անվանել այն պնդումը, թե Թուրքիան նավթ է գնում «Իսլամական պետություն» խմբավորումից (արաբերեն` ԴԱԻՇ)։ Նախագահը հայտարարել է, որ կլքի նախագահի պաշտոնը, եթե ապացույցներ ներկայացնեն
Թուրքիային զրպարտելու իրավունք ոչ ոք չունի` ասելով, թե նավթ է գնում ԴԱԻՇ-ից, հայտարարել է Թուրքիայի նախագահ Ռեջեփ Թայիփ Էրդողանը` ելույթ ունենալով Քաթարի մայրաքաղաք Դոհայում։
«Թուրքիան բարոյական արժեքներն այդքան չի կորցրել, որպեսզի թույլ տա նավթ գնել ահաբեկչական կազմակերպությունից»,- ասել է Էրդողանը։
Նա նաև հայտարարել է, որ պատրաստ է լքել նախագահի պաշտոնը, եթե ապացուցվի, որ Թուրքիան նավթ է գնում ահաբեկիչներից։
Նույն օրը Ռուսաստանի պաշտպանության նախարարությունը արբանյակային լուսանկարներ է ներկայացրել, որոնք ցույց են տալիս, թե ԴԱԻՇ-ի` նավթով բեռնված բենզատարներն ինչպես են թուրք-սիրիական սահմանը հատելուց հետո ուղևորվում վերամշակման։ Նախարարությունը նաև տվյալներ է հրապարակել հումքի մաքսանենգային արդյունահանման ենթակառուցվածքի մասին։
ՌԴ պաշտպանության վարչության ազգային կենտրոնի պետ, գեներալ-լեյտենանտ Միխայիլ Միզինցևը հայտնել է նաև, որ միայն վերջին շաբաթվա ընթացքում Թուրքիայի տարածքից ահաբեկիչների ջոկատներ է անցել շուրջ 2 հազար գրոհային, տեղափոխվել է ավելի քան 120 տոննա զինամթերք և շուրջ 250 միավոր տարբեր նշանակության ավտոմոբիլային տեխնիկա։
