ԵՐԵՎԱՆ, 2 դեկտեմբերի– Sputnik. Սահմանադրական փոփոխությունների հանրաքվեի ավարտից հետո առաջինը կհրապարակվեն էլեկտրոնային քվեարկության արդյունքները: «Այո»-ների ու «ոչ»-երի հարաբերակցությունը կսկսի պարզվել հավանաբար կեսգիշերից հետո: Հանրաքվեի օրվան ընդառաջ Sputnik Արմենիա ռադիոկայանի հարցերին է պատասխանել ԿԸՀ նախագահ Տիգրան Մուկուչյանը:
Նա հայտնեց, որ Սահմանադրական բարեփոխումների հանրաքվեին էլեկտրոնային տարբերակով մասնակցողներն ունեին 5 օր ժամանակ. այն սկսվել էր նոյեմբերի 27-ին և ավարտվեց դեկտեմբերի 1-ին` ուղիղ ժամը 20.00-ին: Բայց միայն դեկտեմբերի 6-ի ժամը 20.00-ից հետո, երբ կփակվեն բոլոր ընտրատեղամասերն ու կամփոփվեն բնակչության մասնակցության տվյալները, ԿԸՀ-ն կհրապարակի դրանք: Այդ պահից սկսած 3 –ժամյա պարբերականությամբ ԿԸՀ-ն կթարմացնի ընտրատեղամասերից հավաքագրվող տեղեկությունները, իսկ լրագրողներն առցանց ցուցատախտակի միջոցով կկարողանան հետևել հետընտրական գիշերվա մանրամասներին:
Առաջին անգամ, ըստ ԿԸՀ նախագահի, կգործի տեղեկատվության վերլուծության կենտրոն: Այստեղ կհավաքագրվեն խախտումների վերաբերյալ հրապարակումները, մասնագետները կգնան դրանց հետքերով ու կգրեն արդյունքների մասին:
Sputnik Արմենիա ռադիոկայանի հետ բացառիկ հարցազրույցում ԿԸՀ նախագահն անդրադարձավ քարոզարշավի ընթացքին: Նա նշեց, որ ԿԸՀ-ն եզակի ահազանգեր է ստացել, ինչը նա գնահատում է որպես քարոզարշավի նորմալ ու հանգիստ ընթացք: ԿԸՀ-ն չի արձագանքում «Ոչ»-ի ճակատի որոշ գործիչների` իրենց միջոցառումները խոչընդոտելու մասին հրապարակումներին, որովհետև դրանք, ըստ Մուկուչյանի, փաստարկված չեն ու առավելապես քաղաքական բնույթ ունեն:
Տիգրան Մուկուչյանը, պատասխանելով հնարավոր ընտրախախտումների, մասնավորապես` երկրում չգտնվողների կամ քվեարկությանը չմասնակցածների փոխարեն քվեարկելու մասին հարցերին, ևս մեկ անգամ շեշտեց, որ դա քրեական հանցագործություն է, ու ԿԸՀ-ն, բողոքներ ստանալու դեպքում, կգնա դրանց հետքերով:
ԿԸՀ նախագահը գրեթե բացառեց նույնականացման քարտերով կրկնակի քվեարկության հավանականությունը, տեղեկացրեց, որ անձնագրերում այս անգամ բոլորովին նոր նմուշի դրոշմակնիք կդրվի, իսկ թանաքը կանհետանա նախատեսվածի պես`12 ժամվա ընթացքում:
ԿԸՀ նախագահի վերջին բացատրություններն ու բացահայտումներն առավել մանրամասն` Sputnik Արմենիա ռադիոկայանի եթերում:
ԿԸՀ. «այո»-«ոչ»-ի հարաբերակցությունը կպարզվի կեսգիշերից հետո
18:35 02.12.2015 (Թարմացված է: 20:37 02.12.2015)
© aravot
Բաժանորդագրվել
«Այո»-ների ու «ոչ»-երի հարաբերակցությունը կսկսի պարզվել հավանաբար կեսգիշերից հետո: Հանրաքվեի օրվան ընդառաջ Sputnik Արմենիա ռադիոկայանի հարցերին է պատասխանել ԿԸՀ նախագահ Տիգրան Մուկուչյանը:
