ԵՐԵՎԱՆ, 2 դեկտեմբերի- Sputnik. Մյունխենի ժամանակակից պատմության ինստիտուտը 2016թ.-ի հունվարին կվերահրատարակի Ադոլֆ Հիտլերի «Mein Kampf» («Իմ պայքարը») աշխատությունը, որը Գերմանիայում չի հրատարակվել Երկրորդ համաշխարհային պատերազմից ի վեր։ Այս մասին հայտնում է BBC-ի ռուսական ծառայությունը։
Աշխատանքը կտպվի երկու հատորով և կարժենա 59 եվրո։ Առաջին տպաքանակը կկազմի 3,5-4 հազար նմուշ։
Հրատարակչի խոսքով` բնօրինակ տեքստին զուգահեռ կներկայացվեն նաև քննադատական մեկնաբանությունները։
«Mein Kampf»-ի վերահրատարակման լուրը բացասական արձագանք է գտել Գերմանիայի հրեական համայնքում։ Հրեաները վստահեցնում է, որ «Mein Kampf»-ը վտանգավոր գիրք է։
Սակայն ինստիտուտի աշխատակիցները վստահեցնում են, որ գիրքը վերահրատարակում են հենց այն պատճառով, որպեսզի հերքեն գրքի շուրջ հյուսված առասպելները և ցույց տան Հիտլերի թեզերի անհիմն լինելը։
Երկրորդ համաշխարհային պատերազմի ավարտից հետո «Mein Kampf»-ի իրավունքը պատկանում է Բավարիայի դաշնային երկրի կառավարությանը։
Վերջին 70 տարում տեղի իշխանությունը կտրականապես հրաժարվում էր հաստատել գրքի վերահրատարակումը։ Սակայն 2016թ.-ի հունվարի 1-ին լրանում է հեղինակային իրավունքների պահպանման ժամկետը, և բոլոր ցանկացողները կարող են վերահրատարակել այն։
Հիտլերը «Mein Kampf»-ը գրել է 1920-ական թթ.-ին բանտարկության ժամանակ։
Սա ինքնակենսագրական աշխատանք է, բայց միաժամանակ քարոզում է նացիոնալ-սոցիալիզմի գաղափարը։
