ԵՐԵՎԱՆ, 2 դեկտեմբերի- Sputnik. The Washington Post թերթը The Fusion poll գործակալության հետ հետազոտություն է անցկացրել, և պարզվել է, որ 2000-ականների սերնդի ներկայացուցիչները սկսել են հոռետեսորեն վերաբերվել «ամերիկյան երազանք» գաղափարին։
Հարցախույզի ժամանակ 18-34 տարեկան մասնակիցներին հարցրել են, թե ինչ է «ամերիկյան երազանքը»։ Այդ նույն հարցը տարիներ առաջ` 1986թ.-ին, տրվել էր հասարակ քաղաքացիներին, և ահա 30 տարի անց համեմատականներ են անցկացվել։ Երեք տասնամյակի ընթացքում ավելացել է այն մարդկանց թիվը, որոնք ազգային գաղափարը մեռած են համարում, նրանց թիվը 12 տոկոսից հասել է 29-ի, ընդ որում առավելագույն աճ է նկատվել սպիտակամորթ բնակչության շրջանում (10 տոկոսի փոխարեն` 29 տոկոս), հաղորդում է ՌԻԱ Նովոստին։
Այսպես է մտածում բարձրագույն դպրոց չհաճախած յուրաքանչյուր երրորդ երիտասարդը, տարիներ առաջ անցկացված հարցման ժամանակ «երազանքի» գաղափարը չկայացած էր համարել յուրաքանչյուր հինգերորդը։ Ընդ որում, որքան բարձր է կրթության մակարդակը, այնքան շատ է հիասթափվածների թիվը։
Ազգային գաղափարի կողմնակիցների թիվը կրճատվել է, 1986թ.-ի 16 տոկոսի փոխարեն այժմ 32 տոկոսն է հավատում այդ գաղափարին։
Բացի այդ, փոխվել են «ամերիկյան երազանքի» առաջնահերթությունները. եթե 30 տարի առաջ քաղաքացիների 80 տոկոսը համարում էր, որ ամերիկյան երազանք ասելով` պետք է հասկանալ «սեփական ուղու ընտրության ազատությունը», 76 տոկոսը վստահեցնում էր, որ երազում է բնակարանի մասին, իսկ 73 տոկոսն ուզում էր երեխաներին քոլեջ ուղարկել, ապա այսօր 68 տոկոսը երազում է սեփական գործի մասին, 67 տոկոսը` երեխաներին քոլեջ ուղարկելու մասին, իսկ 65 տոկոսը` սեփական կրթության մասին։ «Ազատություն» բառն այլևս առաջին հորիզոնականներում չէ։
Այնուամենայնիվ, «ամերիկյան երազանքի» առանցքային տարրը` հարստանալու ձգտումը, կորցրել է նշանակությունը։ Այդպես է կարծում երիտասարդության 29 տոկոսը, իսկ 30 տարի առաջ նրանց թիվը 40 տոկոս էր կազմում։
Հետազոտության հեղինակների կարծիքով` նման արդյունքները կապված են 2008թ.-ի համաշխարհային ֆինանսական ճգնաժամի հետևանքների հետ, որի պատճառով մեր օրերում 20-ամյա երիտասարդի համար նույնքան բարդ է ԱՄՆ-ում աշխատանք գտնելը, որքան 80-ականների կեսերին։
