ԵՐԵՎԱՆ, 2 դեկտեմբերի —Sputnik. Մարկ Ցուկերբերգը հայտարարել է, որ ինքն ու կինը` Պրիսցելա Չանը, պատրաստվում են Ֆեյսբուքի բաժնետոմսերի 99%-ը նվիրաբերել, որպեսզի աշխարհն ավելի լավը դառնա։
«Մենք մեր կյանքի ընթացքում Ֆեյսբուքի բաժնետոմսերի 99%-ը, որն այս պահին 45 միլիարդ դոլար է կազմում, կնվիրաբերենք, որպեսզի օգնենք մարդկանց ու հաջորդ սերունդների համար աշխարհն ավելի լավը դարձնենք»,- իր անձնական էջում գրել է Ցուկերբերգը։
Ֆեյսբուքի հիմնադիրը նման հայտարարություն է արել դստեր ծննդյան կապակցությամբ արված գրառման մեջ։
Ֆեյսբուք սոցիալական կայքից ամեն օր 1.01 միլիարդ մարդ է օգտվում, ինչը 14 տոկոսով շատ է անցած տարվա ցուցանիշից։ Ֆեյսբուքի ամսական լսարանը 1.5 միլիարդի է հասնում։
