ԵՐԵՎԱՆ, 2 դեկտեմբերի – Sputnik. Աշխարհում ամենամեծ սոցիալական ցանցի՝ Ֆեյսբուքի հիմնադիր Մարկ Ցուկերբերգը դեկտեմբերի 2-ին գրառում է կատարել իր անձնական էջում, որն ամբողջությամբ նվիրված է դստերը:
Ցուկերբերգն այսպես է սկսել իր նամակը. «Սիրելի Մաքս, ես ու քո մայրը բառեր չենք գտնում արտահայտելու այն բոլոր սպասումները, որ պարգևեցիր մեզ: Քո նոր կյանքը լի է խոստումներով, և մենք հույս ունենք, որ դու առողջ ու երջանիկ կլինես և կկարողանաս լիովին բացահայտել կյանքը…»:
Հուզիչ ու երկարաշունչ նամակի տակ օգտատերերը Ցուկերբերգին շնորհավորել են դստեր ծննդյան կապակցությամբ:
Մարկ Ցուկերբերգի ու Պրիսցիլա Չանի սիրավեպը սկսվել էր դեռ այն ժամանակ, երբ Ֆեյսբուքը չէր էլ ստեղծվել: Նրանք ամուսնության որոշում էին կայացրել 9 տարվա սիրավեպից հետո՝ 2012 թվականին: Ամուսնական զույգը մի քանի տարի շարունակ երազում էր երեխա ունենալու մասին, և ահա այս գրառումից պարզ է դառնում, որ նրանց երազանքը վերջապես իրականություն է դարձել:
