ԵՐԵՎԱՆ, 1 դեկտեմբերի- Sputnik. ՌԴ նախագահ Վլադիմիր Պուտինը հայտնի երգիծաբան Գենադի Խազանովի հետ հանդիպման ժամանակ հայտնել է, որ հրամանագիր է ստորագրել «Հայրենիքին մատուցած ծառայությունների համար» առաջին աստիճանի շքանշանով պարգևատրելու մասին։ Նախագահը Խազանովին խոհարարական գիրք է նվիրել։
Արտիստն էլ իր հերթին կայսերական թագի պատճենն է հանձնել Ռուսաստանի նախագահին։ Հանդիպումն անցկացվել է Կրեմլում։
«Թույլ տվեք շնորհավորել Ձեզ 70-ամյակի կապակցությամբ և տեղեկացնել, որ բազմամիլիոն երկրպագուների հանձնարարությամբ հրամանագիր է ստորագրվել Ձեզ «Հայրենիքին մատուցած ծառայությունների համար» առաջին աստիճանի շքանշանով պարգևատրելու մասին։ Շքանշանի անվանումը համապատասխանում է Ձեր արած գործին»,- ասել է Պուտինը։
Ռուսաստանի նախագահը շնորհակալություն է հայտնել արտիստին նրա արվեստի ու «ծանր աշխատանքի» համար։
Թեյի սեղանի շուրջ Խազանովը նկատել է, որ հանդիպմանը ներկա լրագրողները դեռ դուրս չեն եկել։ Նա ասել է, որ իրենց հետագա զրույցի մասին կարելի է և չգրել։
«Ոչ, ոչ, մեզ մոտ ամեն ինչ գրում են»,- ասել է Պուտինը։ Արտիստը փորձել է պնդել իր խնդրանքը. «Այն, ինչ ասելու եմ, բոլորովին անպայման չէ գրել»։ «Իհարկե, անպայման չէ, բայց ամեն դեպքում գրում են»,- ժպիտով առարկել է երկրի ղեկավարը։
Արտիստն իր նվերը հանձնել է նախագահին, որին ի պատասխան Պուտինն ասել է.
«Եթե ինչ-որ համեստ բան նվիրեիք, ես այն ինձ կթողնեի, իսկ հիմա ստիպված եմ հանձնել Կրեմլին»,- ասել է Պուտինը։ Խազանովն էլ իր հերթին առաջարկել է նվերը դնել նախագահի աշխատասենյակում։
«Ոչ, ոչ, շատ շնորհակալ եմ»,- հրաժարվել է Պուտինը։ Այնուհետև նա վերցրել է թագն ու դրել արտիստի գլխին. «Քանի որ հոբելյարն այսօր ես չեմ, այլ Դուք, ապա սա հենց Ձեզ համար է»,,- նշել է նախագահը։
««Գլխարկը» ծանր է»,- ասել է Խազանովը։
