ԵՐԵՎԱՆ, 1 դեկտեմբերի- Sputnik. ՌԴ վարչապետ Դմիտրի Մեդվեդևը ստորագրել է Թուրքիայի դեմ հատուկ տնտեսական միջոցներ կիրառելու մասին որոշումը, երեքշաբթի հայտնել է ՌԴ կառավարության մամուլի ծառայությունը։
«Ռուսաստանի Դաշնության կառավարության ղեկավար Դմիտրի Մեդվեդևը ստորագրել է Ռուսաստանի նախագահի հրամանագրի իրագործման միջոցների մասին որոշումը»,- ասվում է հաղորդագրությունում։
Սահմանվել է, որ ցանկով նախատեսված ապրանքների նկատմամբ սահմանափակումները չեն տարածվի այն ապրանքների վրա, որոնք ներկրվում են անձնական օգտագործման համար (Եվրասիական տնտեսական միության թույլատրած ծավալով)։
Որոշումն ուժի մեջ կմտնի պաշտոնական հրապարակման օրից։
Ռուսաստանի և Թուրքիայի հարաբերությունները կտրուկ սրվեցին, երբ նոյեմբերի 24-ին Սիրիայում վթարի ենթարկվեց ռուսական Սու-24 օդանավը։ Ռուսաստանի նախագահ Վլադիմիր Պուտինը հայտարարեց, որ ինքնաթիռը խոցվել է սիրիական տարածքում թուրքական F-16-ի կողմից, այնուհետև օդանավն ընկել է Թուրքիայի սահմանից 4 կմ հեռավորության վրա: Ռուսաստանի նախագահն այս դեպքը «թիկունքից հասցված հարված» որակեց։
Թուրքիան պնդում է, որ Սու-24-ը խախտել է իր օդային տարածքը։ ՌԴ գլխավոր շտաբը հայտարարել է, որ ինքնաթիռը չի հատել սահմանը, ինչի վկայությունն են Սիրիայի ՀՕՊ-ի տվյալները։
Պուտինը նոյեմբերի 28-ին Թուրքիայի նկատմամբ հատուկ տնտեսական միջոցներ կիրառելու մասին հրամանագիր է ստորագրել։ Նախագահը հանձնարարել է արգելել չարտերային թռիչքները, Թուրքիայի քաղաքացիներին 2016թ.-ի հունվարի 1-ից աշխատանքի ընդունելը։ Հրամանագրով արգելվում կամ սահմանափակվում է Ռուսաստանի տարածքում Թուրքիայի իրավասության տակ գտնվող կազմակերպությունների գործունեությունը, արգելվում կամ սահմանափակվում են որոշ թուրքական ապրանքների ներկրումը։
